英帝首相波叔都居然中新冠武肺(編按：即新冠肺炎)，真係頂唔住入咗去醫院。原本佢民望麻麻，點知佢入院，加埋事頭婆嘅全國演說，真係講到心坎之中，成個政治形勢翻轉。因為至少反對波叔嘅人，依家都唔敢鬧住，等波叔好返。波叔好返晒，重出江湖，睇怕民望爆升，冇人迫佢下台矣。
外電有云，英帝國家醫療專家小組，起初都對於疫情有大量的模型推算，但就唔知點解，當咗新冠武肺係好似流感咁樣處理，之後又唔敢提議用更大的力度去做封關，直至意大利疫情失控，首相先至一百八十度轉彎，決定封關封城，以壓平曲線，等醫療系統可以頂住呢個浪。唉！真係認錯認得太遲。由於波叔中了招，大家暫時唔再追究落去。他日疫情穩定之後，人民一定追究到底啦。
點追究？早前，英帝工黨有新黨魁施紀賢。賢叔今次總算係臨危受命，因為上次大選工黨輸到連老巢蘇格蘭都甩晒，證明極左路線係唔work。今次賢叔有五成六支持度，取得過半支持，佢係會將工黨慢慢由極左走向溫和。上次大選，保守黨搵極右嘅波叔出來領軍，工黨就搵極左嘅彬叔出來對撼。當時呢，有一種講法，就係極右保守勢力回朝的話，唯一對付佢地的方法，就係要用極左的路線去打贏佢地。即係人地走右，我地走左，迫中間作選擇。咁樣同賭大細無分別。結果極左輸晒，選民寧願要極右而唔要極左。今次賢叔出來走向較為中間嘅路線，會唔會有轉機呢？Well，如果疫情咁樣落去，而波叔又病好之後打贏了疫戰，咁工黨都有排等矣。
疫情豈止打低波叔，連美帝侵侵幾乎沒頂。有一個好奇怪的現象：明知意大利爆到唔清唔楚，點解英美雙帝好似在夢中一樣呢？美帝最近有個報道，話一月中已經有專家組同埋有專家提醒侵侵，新冠武肺好大件事，千祈要小心。點知高層好似石沉大海一樣。如果屬實，報道矛頭就係直指侵侵無能啦。但係睇返報道嘅脈絡，同埋英帝果邊嘅報道，侵侵又好波叔都好，佢地身邊嘅部分專家，應該係出咗問題。盲點都係一樣嘢：佢地唔敢提出一些相當嚴厲嘅手法去對付疫情，又或者咁樣講，響佢地嘅政策規劃當中，係冇封城封關呢樣嘢，因為佢地呢班科學家唔係好信，咁樣做會得到市民支持。
美帝民主黨桑德斯退出初選，拜登出硬線，奧巴馬即加持。即係美民主黨用中間路線撼侵侵。響打擊疫情方面，美民主黨都好克制，唔好俾人覺得佢地扯後腿。但佢地最近嘅講法係，奧巴馬年代好重視抗疫，仲領導全球打擊伊波拉，仲響白宮成立抗疫專家組等，點知侵侵上台後裁撤晒呢堆部門同專家。呢招連消帶打，篤咗侵侵冇能力抗疫。抗疫角力，剛剛開始矣。