唔少人關注十一月香港的區議會選舉。最後係問一個問題：點解冇中間力量？香江點會冇中間力量呢？但係響香港呢個威權政府，選出來的議員權力有限，加上北京對港政策係逢民必反，迫到整個政治環境係冇中間路線，從政者只可以選擇親中或反中。於是呢？well，中間路線咪消失囉。選民會想：選個中間路線又無權無辦法，不如選一個激進嘅泛民，又或者極保守的建制。前者幫我反政府，後者派米派飯送月餅，不知幾happy，係未？
不過響真正民主社會，理論上會有中間路線之生存。台北市長柯P(柯文哲、圖)終於組黨，佢想總統，想到頭都大晒。柯P叫做台灣民眾黨，即係非藍非綠，白色力量嘛。白色力量之最大問題，係上一次佢地參加咗年初之立法委員補選，結果都係輸晒。咁真係奇怪：既然好多人聲稱支持中間路線，柯P最後都係谷唔上補選之選票呢？咁其實代表咗響單對單立法委員的選舉，柯P之支持者未必夠票贏。佢組黨之目的，係希望全國取得足夠的票數，可以取得不分區立委之議席。至於總統之選舉，就要再思考點樣發圍。
原本佢以為可以拿深綠之支持，之前都拜訪過班深綠大老。結果呢，早兩日深綠大佬，終於歸隊支持English Choi，而淺綠嘅一早已經歸晒隊支持English Choi。咁樣佢只能夠去挖啲中間之淺藍，但係響Korean Fish被揀好(暫時)去參選之後，淺藍唔見得幫柯P，於是傳出佢要搵郭大老闆或者藍營本土大將Golden平(王金平)。但係，如果呢個柯P黨，都係淺藍為主又唔得，因為咁樣即係國民黨B黨。外傳都有部分已經退出藍綠陣營之政界人物想加入柯P，咁真係頭痕。如果響呢個形勢下選總統，冇乜大老撐場，好易輸。所以，外界傳柯P會同郭大老闆合體參選，睇下點？
中間派點解會冇運行？可能都同國際局勢有關嘅。美帝侵侵連任道路，又係走極右路線。行咗快四年，咁依家美帝民主黨都係思考緊，究竟係玩各走極端之路線，由一個走極左路線的候選人(注意：響美帝，極左路線大抵都只係歐洲國家左翼政黨內的溫和路線而已)例如依家黨內民調領先嘅華倫女士，去同侵侵硬撼，定係中間路線之拜票去搵番啲美帝民間之中道選票呢？要贏侵侵應該走邊條路，民主黨已經拗咗幾年。歐洲經驗呢？就係有一個極右或極左政府後，中道力量會贏番國會議席，因為各走極端係無辦法處理一些複雜的社會問題。但係歐洲唔係美帝。歐洲的中道路線去了美帝就變成極左，咁樣，如果美帝民主黨搵派登呢啲中道力量，咁響一啲美帝中部州分，係未有運行呢？唔好忘記，拜登之路線，唔少人覺得真係太過精英，唔夠貼地。真係頭痕也。