近日政府畀人鬧到死。人同動物好唔同。人係有靈性與感情。如果人人都係理性動物，咁唔使搵人管治社會，搵AI 電腦就得。正因為咁，當一個領袖要搞公共政策，搞到老人家要出來陳情，咁政策就是「無情」。「無情」的政策，邊有議員願意支持？
當日好打得話，取消60至64歲老年綜援，係放響預算案內，建制派有份通過。講完之後，嘴角一戚，當堂激到建制派紮紮跳，我等小民笑到卡卡聲。老友A話，大家錯怪咗IQ一千局長了。因為舊年將呢個項目，放入預算案裡裡暗渡陳倉時，就係好打得老細親自下旨。好了，當佢爆出建制派有份支持之言論後，大家將矛頭指向IQ一千局長同埋署長，而好打得就唔知走咗去邊了。
老友A之言，不知真假，但就似好打得二、三十年的為官作風，不足為奇。大家唔明，只係你響官場唔夠耐而已。難得IQ一千局長，仲響出來頂到底，算係有義氣。一個領袖原來要花精神要響預算案內增減項目，可想而知，點解佢平日瞓得少，因為時間就花晒響技術細節，做埋超級局長。
世界變得快，今個月，好打得民望立即打回原形，依家支持率跌到37%，仲有七個百分點就去到連任分界線，畀我就唔去達沃斯交朋結友搶鎂光燈，即刻回港救民望了，不過，有主席因素響度，只要主席話佢連任OK，大家捱多一屆矣。
所以主席呢張牌，真係緊要。今個月English Choi民望大升，反彈了十個百分點，一舉清洗頹勢，咁就真係可喜可賀。好多時會勸大家，唔好低估English Choi之政治觸覺。翻盤之後，自然會響大打特打強國牌。老友A話，民進黨四月最遲要搞總統初選，在此之前，傳統上會向黨內深綠靠攏，響取得黨內總統候選人資格之後，立場就會轉為溫和。
不過，今時今日，時代唔同晒。因為依家同北方大國翻臉，轉頭親美，咁English Choi走向溫和的話，即係同強國示好，咁未必符合美帝侵侵之利益。老友A之分析，係建基於兩岸關係是寶島選舉，過往的發展軌跡而得到的經驗及心得。但依家兩岸因素未必係總統選舉的主軸，反而係美帝因素先至係一個最主要因素。既然係咁，係未仲要用傳統智慧去分析English Choi的選情呢？
睇實美帝的選情。因為民主黨幾位參選人已跳落火坑，個個都以打倒侵侵為假想敵。民主黨眾議院院長Nancy姐直接打臉侵侵，暫停政府多陣啦，似乎侵侵都冇晒符。英國May 姐一如所料，脫歐Pan B被噓，但係保守黨同工黨都冇心隊走May 姐，等住歐盟畀多幾個月英國傾脫歐。留意哥倫比亞政局，今次係左翼政權保護戰，如果哥倫比亞左翼一倒，右翼回歸，加埋巴西已經轉右，咁侵侵式政治就成功輸出拉美。