呢幾日，美帝國務院之報告，炮打香江好打得，去年十月將一個美方想拉嘅人士放咗，激到美帝彈起。當然，依家大家都唔知係邊個。肥平案件審案之時，其實已經爆咗佢嘅身份，但點都好，成件事已經成為美帝炮轟香江之藉口。
唔好忘記，美帝對港政策，唔止係一個《香港政策法》。因為《香港政策法》只係一個國會之法律條文，係要求國務院定期交有關香江一國兩制之實施情況。如果係唔理想的，咁美帝總統就有權唔再根據有關法律畀香江一個特殊之優惠政策。舉例，美帝時不時有一啲高科技產品唔會出口畀一啲國家，咁因為香江有一國兩制，美帝就可以出手口畀香江。當然，件貨去了香江之後，會唔會走咗去第二度，例如北韓，咁就唔知啦。但至少美帝呢啲特別待遇，對香江經濟有利無害啦。
但如果只睇《香港政策法》，梗係唔夠啦。九七前後，美帝恐怕香江成為犯罪中心，好多罪犯好可能去咗，或者留響香江逃避刑責。九七前，美帝可以向英國佬施壓，英國會向港府施法，咁美帝要嘅罪犯，香江政府當然要交畀美帝啦。但九七後，美帝擔心香江成為走犯中心，又唔可能迫到北大人交人，咁唔係咁好。所以，美帝就同香江簽咗一個移交逃犯之協議，響有時發生之時，香江政府幫手拉人交去美帝。呢個協議，就係一個友好展現，係香江願意跟美帝之旨意行事嘅心意，美帝比較放心。所以，香江願意移交逃犯係畀美帝一個信心保證。
今次香江同美帝say no，美帝當然火滾啦。問題係，件事去年十月發生，到了今日，可能連好打得都唔記得。依家美帝忽然出手，乜事呢？
有兩點值得思考。第一，美帝對華其實只有硬，不會軟。美帝之操作，就一定會用強國周邊之地區及事態，然後介入之，迫到強國跪低為止。過去一年，侵侵上台後，已經響印度太平洋地區展示圍緒之勢。美帝利用日本、韓國加會談，又借台灣等，四方八面同北方大國砌過。香江素來都親美親西方，響西方國家拿過咁多好處。依家美帝利用完日本韓國同台灣打強國之後，矛頭就去咗香江。咁香江人就要明白，依家係美帝怒打香江好打得唔放人畀美帝，實際上就係要用香江議題去打強國。
第二，美帝國務院響份報告之中，鬧完好打得唔肯放人畀美帝之後，同一段又鬧香江，冇按照聯合國安理會決議之要求，立法制裁某些國家。雖然冇講係乜內容，但明眼人都估到，應該係指北韓啦。香江要按聯合國要求立法制裁北韓，就要睇上面外交部有冇咁嘅柯打，咁香江冇做，好明顯外交部冇柯打。點解外交部唔出聲呢？係未外交部有意唔叫香江政府做呢？耐人尋味矣！