去Pub就好似係倫敦生活嘅一部分，去Pub除咗同朋友傾偈外，同時，都係開餐嘅好地方，一邊食一邊傾，真係好爽，最重要係食物水準一般都唔差。
講番福爾摩斯酒吧，係一間以福爾摩斯為主題嘅Pub。全店分上下兩層，樓下係傳統英倫酒吧，而樓上係餐廳，提提你，其實酒吧都可點餐食。去Pub都係以啤酒等大路飲品為主，大家可以試吓佢地自家品牌嘅麥芽啤酒。食物方面，邦主就會揀比較地道嘅肉批，唔通又食炸魚薯條咩！喺樓上餐廳仲有間房，裝飾到好似福爾摩斯間書房，專係俾大家拍照留念，要係咁先可以叫主題酒吧㗎嘛！
成間Pub最謎嘅地方就係佢嘅網上評語，鬧又鬧得狠，但讚又讚得勁。睇完都唔知去唔去好？！邦主就覺得既然去到倫敦，試吓都係一種體驗。