做評論員咁耐，一直都相信，有一件社會事件發生，千祁唔好立即跳入火炕嗰度做即時評論。原因係，呢個世界好複雜。社會事件之背後，必然有好多唔同因素交織而成，太早下定論好容易錯判形勢，做錯分析，甚至影響日後的決策。
台灣地方選舉之賽後分析，亦應作如是觀。以高雄市長選舉為例。好多香江人士睇到韓國瑜(相)佢來勢洶洶，外表又太平凡，講嘢又唔知講乜「韓流」，無理由贏，一定係English Choi政府工作太差。查實選後爆料至知，「韓流」後面梗係唔止韓國瑜一條友做啦，原來佢背後係有王金平呢位藍營大佬幫手，響南部地方整合勢力所致。咁以金平叔之食力，同呢班南部的地方大哥一定傾得好掂，係未？
地方人脈響寶島選舉，非常重要。台中市之選情又係點呢？原本嗰位市長佳龍哥，政績冇咁多，但未至於一無是處，所以有民調都話佳龍哥同藍營候選人盧秀燕好有機會打成平手，勝負係一萬幾千票之事。點知去到選戰後期，原來台中市內嗰啲地方派系忽然傾好晒，佢地又同藍營傾得埋，一拍即合，於是去選戰後期，佳龍哥都知道自己都凍過水矣。
所以睇今次選戰，人地綠色執政咗兩年幾，基本上政績唔夠多係一個重要因素，同樣其他因素包括候選人質素、地方派系整合等等，都係重要因素。所以響睇台灣之選戰，唔好用香港嗰套框架去睇其他地區之選舉，咁就好容易分析錯晒。
最後亦有人批評，今次English Choi響選戰方面出現了戰略失誤，確實係搞到選戰出晒事。一個例子就係台北市。因為English Choi上台之後，都係好親近某個派系嘅人，成個辦事作風都畀呢個派系嘅人所綁架。於是就響台北市嗰度，唔肯同柯P講數，而係決定去支持一個自己人文智哥出選。一出選，文智哥就出晒事，根本上就點樣招數都用盡，亦係冇辦法抬佢上去。
有一些智者有講，綠營執政之後，形勢好差，縣市選舉都應該輸少當贏。誰是朋友，誰是敵人，邊啲係主要敵人，邊啲係次要朋友，都要計清楚。因為高雄、台中、新北似乎都有輸嘅趨勢，咁樣形勢之下，係未應該放軟些少手腳，等柯P贏選出台北市，總好過台北市，呢個咁有指標性之地區都輸埋畀藍營呢？
去到選戰後期，有人進諫之後， English Choi不為所動，因為佢地擔心柯P贏咗之後，佢可能會劍指總統之位，對 English Choi連任不利。於是響呢個考慮之中，加埋文智哥到底都係自己人，於是English Choi最後都決意支持文智哥，令綠營基本盤回流，結果搞到柯P之選情緊張，幾乎輸埋。
呢件事睇到，English Choi見到戰略出錯，文智哥點都唔得，係未應該及時轉變策略定係硬食到底呢？大家不妨思考下。