只要你打開網頁去唔同國家及地區，全部都係武漢肺炎(編按：即新冠肺炎)嘅消息。美帝最令人關注，因為單係紐約州(包埋市同州)嘅感染數字，已經係全國一半，咪話唔令人擔心。至於英帝就大件事，因為皇位第一繼承人查理斯王子中咗招。佢已經七十有一，係人都知武肺對老人家影響最大，確實令人擔心佢嘅安危。
問題係，各國唔知點解會低估咗疫情。依家最流行嘅講法，係因為各國對於防疫方面，好多時係先忽視後警覺。即係佢地國家嘅公衛專家，唔知點解會覺得，武肺係一個同流感好似嘅病毒。流感喎，似乎又真係冇乜好驚。而且，今年一月初，一開頭世衛又話好難會出現人傳人，咁公衛專家又好似信到十足。
此言差矣。如果大家信晒世衛，咁斷估全球都幾乎會中晒招啦。呢班公衛專家唔識得搵香江、新加坡、台灣甚至北京拿資料咩？響疫症初期，好多地區已經嚴陣以待。好明顯係有一班公衛專家，唔係好信又或者唔係好明點解呢啲國家或者地區，對呢啲同流感好似嘅疫症，用啲咁強力嘅措施。所以呢啲國家或地區響疫症初期，自己又掉以輕心，同市民講解時又令人覺得可以當感冒咁處理。
呢樣嘢好弊。然而，當病毒不斷散播之後，情況大感不妙，而且感染者人數以幾何級數爆升，各國又發覺唔對路，自身嘅醫療體系頂唔到咁多人入院，於是醫院打晒警號，就快爆煲。呢個時候，好多領袖忽然醒覺，即使係死亡率低，但係只要死咗一個，就不斷有病人過身，仲要幾何級數爆升上去，醫療人員亦唔夠，保護衣又唔夠，大家叫晒救命。咁呢個時候，政府就要用強力措施壓制，封市封城封關甚至經濟停擺，以保護大家。
英國就係初時懶懶閒當無嘢，仲叫人照常返工返學，後來發覺唔對路，於是決定硬起來，幾日就轉軚。無他嘅，美帝見英帝亂來但冇王管，咁樣落去唔係辦法，於是就限飛啦。一有限飛甚至停機，咁就真係迫到英國冇路可走，波叔寬鬆而美帝嚴格的話，好難講得通。咁英帝重新要搞嚴厲手段，仲搞到天怒人怨。人民都會問，究竟疫情係未真係好嚴重呢？如果係勁嘢，點解一開頭唔努力去搞，依家又忽然搞得咁嚴重呢？
歐美國家，有啲好似戒嚴封城(好似意大利同丹麥)，有啲初時係「佛系」跟手就轉係強硬者都有，咁中間派就梗係封啲唔封啲，咁樣底下，邊度可以壓制疫情呢？你叫人唔好去街，班市民仲四圍走開派對建身又跳舞開派對，問你驚未？到咗依家，相信唔少人會同意，呢啲公然違反禁令嘅居民，應該捉去隔離。但係歐洲係法治之國，唔可以隨便限制自由。歐美各國抗疫力度不一，真係會令到疫情久久不散。