市傳政府決定要由禁止電子煙或者加熱煙，我嗰啲醫生朋友嬲到飛起。當然啦，十個醫生十個反煙，自己即使食煙，都會好嬲自己點解食煙，仲非常支持禁煙添。問題係，點解政府明明禁煙，忽然間又支持規管呢？
老友A話，其實博士局長，幾年前做副局長，已經支持禁止電子煙，佢個人支持禁煙，聽講有一位極高級的人叫佢轉換立場云云。
我聽完話，唔係嘛？呢件事關乎公眾健康，點可以政治凌駕專業呢？況且禁止電子煙同加熱煙都係有助健康及有清新之環境，冇理由做醫護界會撐規管也。
老友A表示，佢聽到呢個消息都覺得好奇。不外乎兩個理由。先唔好忘記，當年究竟係邊個執政，邊個做局長，邊個做決策先？依家政治情況好特殊及奇怪，成個氛圍，係要將上屆政府某啲核心粉絲，排除出去。即係「去689化」。
老友A 話，有跡可尋㗎，一陣又監管差人嗰個委員會之主席，又突然換走咗。搞科學嗰個樂園之一姐，又要忽然俾人踢走。仲有可能傳出，連香江最高學府嗰位都岌岌可危。響呢個大環境之外，會唔會唔單止係要「去689化」炒走嗰啲人士，而係連佢之政策，都要好似西諺話齋，「髒水連嬰兒一起倒掉」呢？唔知㗎！
我就話，講到底，你憎某個人，但唔代表連嗰個人執政之時嘅政策，都要一筆勾消啦？當年佢搞嗰啲長者福利，都係好事，唔通全部都要掃走乎？
老友A話，另一個理由，就係有冇人會覺得，究竟乜嘢人，可以有咁嘅力量，要夾到一個咁打得嘅領袖，公然叫一位負責公共衛生，又一定會支持禁煙嘅博士局長公開轉軚呢？
我話，唔係嘅。全地球之煙草商，佢地冇嘢多，就係錢多，利益團體及遊說實力好強。佢地響美帝英帝，請咗唔少人幫佢地做研究做paper做政治關說工作，佢地只係將外國嗰一套政治工作方式，用響香港嗰度之嘛。老老實實，係咪因為佢地同政黨食餐飯，做下遊說，出吓文章，嗰啲政客就會支持煙草商咩？如果係咁，大家又真係太睇小香港政黨啦。
老友A話，政治遊說呢啲嘢，你唔講煙草商都會做啦。大家都知，香港政府素來好鬼惡死兼頑固，一旦政策定好咗，真係雷劈都唔會改。所以大家就應該去思考吓，邊啲力量會令到政府轉軚呢？北方強國睇來睇去都唔會咁樣做啦，因為禁煙呢啲嘢，都係香江之內政，冇理由北方大國會理埋呢啲嘢。
老友A續曰：咁大家就應該想吓，響當時好打得去選舉時，有冇啲響佢眼中好重要的選委，同埋支持者，係同煙草商有關呢？大家想到之後，都應該豁然開朗，知道乜嘢叫做還政治債囉！
我聽完，真係唔識答，只係問：係咪真㗎？你話呢？