樓市有幾凶險？我真係唔識解讀。但政治有幾凶險，我反而可以做一些分析畀大家，等大家考慮可以點樣趨吉避凶。
美帝有兩個人的新聞，我部手機就會收到通知。我會留意兩條友，一個係美帝國務卿蓬佩奧(圖左)，一個係美帝國家安全顧問博爾頓(圖右)。如果你真係好忙，你想響有限的時間睇最多的資訊，你應該考慮只係睇博爾頓，因為佢依家係侵侵身邊的大紅人，執掌住美帝的外交大腦。
佢響上個月中響一個美帝網台同主持人談天說地，中間其實唔係閒談，而係真係有料到。響訪問之中，講到美帝響亞洲布局方面，佢在意兩個東西，第一，係伊朗啦。咁依位大哥，其實好在意想搞掂伊朗，因為響佢地眼中佢最唔滿意伊朗響中東地區搞事。美帝依家係要不斷地夾擊伊朗，任何係要同伊朗打交道的公司一於被美帝禁絕，又唔會畀伊朗出口石油賺美金，原因梗係制止伊朗經濟繁榮，由得佢經濟困頓而被夾死。美帝呢次打擊敵人之新玩法叫做「極限施壓」，所有措施之目的係施壓，迫走伊朗政府。
第二，博爾頓唔會忘記北方大國。博爾頓響訪問之中，講到明係好關注南海的事情，特別提到要好好咁讓各國艦艇及船隻(美帝的最新說法係南海航海自由)。先唔好理英國或者澳洲有冇派人派軍艦去南海，但好明顯係美帝牽頭多國響度搞南海。博爾頓十分關注南海事情，佢的說法係；美帝唔會因為北方大國上次幾乎將軍艦車過來，我地美帝冇出聲就以為美帝軟弱。咁言下之意，即係下次如果北方大國響南海真係有架艇衝埋去，美帝會唔會咁客氣避開走人，定係會還拖呢？
咁依家博爾頓去咗邊？佢係去咗莫斯科，部署美帝退出美蘇武器協議。點解要退出呢？因為美帝覺得，俄羅斯違反協議，響度私下發展中程彈道導彈囉。實際上，博爾頓覺得，呢個協議綁手綁腳。美帝素來「守法」，所以依協議限制發展中程彈道導彈，但其他國家例如厲害了我的國，同埋北韓，順便又屈埋伊朗，又大搞呢啲導彈，搞到區域軍力不平衡立立亂。如果美帝今次退出成功的話，佢地可以自由發展中程導道飛彈。香江人素來睇嘢好務實：關香江乜嘢事？梗關事，因為啲飛彈發展咗，就可以賣去日本同台灣，明白未？咁呢啲飛彈會指住邊度？射程範圍一定包括香江。香江和平咗七八十年，唔知道其實軍事上香江素來都係被攻擊目標，唔係點解香江解放軍要駐紮響度？
講到呢度，博爾頓之發言，從來都冇提過香江，似乎大家可以好放心繼續飲飲食食。咁樣我都擔心，因為如果佢唔講，一日都唔知佢對港政策之底牌，好令人擔心。但如果佢真係講，仲令人擔心添！