點都好，選舉都完咗。網上大大話話有幾十篇數據分析選舉輸贏之關鍵的文章。老老實實，好多人啲分析，都幾有哲理，顯示大家好肉緊件事啫。但聽老友A講，其實泛民輸掉直選，成單嘢表面複雜，內裡簡單。因為有一班新人，覺得某人被DQ之後，唔應該留響功能組別再選(都應該驚輸)，於是就四圍同人講，將心儀嘅某人，送去補選。為咗達到目標，就將原本贏得初選之「老海鮮」夾走。好啦，依家選輸咗，某啲新人仍然覺得自己無錯，將責任推畀所有人云云。
老友A之說話，都係一個說法啦。但有啲嘢，各位朋友都可以宏觀些少去睇啦。從某一班「新人」角度去睇，上次選舉佢地成為票王之後，當然企響佢地角度，最好就係佢地之盟友，借呢個氣勢不斷擴張同發展啦，係未？一個最好嘅方法，咪就係趁補選之時，將自己同埋盟友，盡量去插旗，係未？咁樣做，自然就會同原有嘅「老海鮮」力量出現矛盾及衝突啦，係未？有矛盾同衝突，最好嘅方法自然就係用選舉定輸贏啦，係未？如果最終「新人」班底輸咗，咁就唯有認命啦。但萬一「新人」同埋佢地之盟友，真係贏晒的話，咁佢地響立法會就忽然成為咗新嘅力量，足以同傳統之飯民政黨抗衡矣。
響呢個角度睇，老友A的說話，亦係冇錯。喂！阿哥，有一班新人挑戰緊舊有之秩序，咁樣一班舊海鮮仲有冇責任去幫你班新人上位呢？須知道，選民一走，隨時冇回頭。咁假如我係一班舊有勢力，係未都會停一停，諗一諗，日後點同呢班新人合作呢？既然係咁，一班新人後起之秀就只能靠自己單打獨鬥，唔能夠乞求舊人出手，亦係正常之事。今次呢班新人搏唔到，認命囉。如果今次真係搏盡成功，真係議會力量大翻身，老海鮮要退潮㗎！
當大家用「新vs舊」之分析框架，就比較容易理解事物之真像。咁當然，講完古仔及分析框架，咁日後應該點樣睇呢？有啲嘢係無論新舊勢力都要理解嘅，就係依家社會之主流真係想休養生息，咁就係適當時候無論新舊人都暫時少啲戾氣多啲祥和，係未呢？咁樣，應該點樣去搞好休養生息呢？大家思考啦，係未呢？仲有，無論係港九新界，組織票先至可以細心長流，咁點樣搞番好各階層組織，同選民互動，然後做番好個群眾基礎呢？當然啦，大家響搞組織之時，亦要借機同街坊解釋，依家面對緊之政治困境，解釋番響咁嘅高壓環境下，從政係相當高危之事，搵命搏，希望街坊唔好介意，到時未必揀到心儀嘅候選人，因為可能連心儀嗰個會被DQ，但都想街坊去投票支持下咁樣。謙卑謙卑再謙卑，就係咁囉。從政邊有捷徑呢？