上星期入了醫院小休做手術。但畢竟人到中年，無辦法好似青年咁樣，即時回復生猛，所以請了一個比較長的病假。
由於係咁，好多事情就停了下來，反而有更多的時間思考下時局。依家時局最大的震撼彈，係郭台銘宣布唔選總統。當然，咁樣宣布，藍營放下心頭大石，但對於整體選戰，English Choi真係獲利。
因為有好多民調都睇到，中間選民係需要一個代表聲音。呢堆中間人就係非藍非綠的人士，即係淺色嗰啲。由於佢地之政黨認同唔係特別強烈，呢堆選民可以響藍綠之間游離。無論係柯P，又或者郭老闆，大家都睇實呢堆選民。佢地認為，只要夾到呢執選民出來，咁響三強鼎立之下，有機會以幾個百分比咁樣，贏出選戰。
中間人彈來彈去唔代表佢地冇政治立場，只係佢地唔係單純用政治立場去投票。柯P同埋郭老闆如果可以合體的話，相信有機會響都會選區，食咗綠營好多人士，同埋淺藍的部分人士，而且，一些「都會藍」，即係藍營blue blood同埋專業人士，都應該會轉頭俾票郭老闆。數字嘅嘢，表面上係冷冰冰，實際上係反映緊，呢個中間組合，有一定的吸票力，對藍綠領導層來講係一個極大的暗湧也。而且，從民調睇到，呢個組合對綠營的破壞力，大過藍營。
問題係，郭老闆經過三思熟慮之後，好多人叫佢唔好去馬，終於唔去，點解呢？有人話，郭老闆出來聲稱考慮參選後，民調睇到，佢既劈藍又劈綠，但民調一直都冇法超越English Choi ，咁唔係話唔得，但如果郭柯合體都冇辦法贏到English Choi，郭老闆思疑脫黨參選真係冇著數，隨時又輸埋。另一個說法係，原本郭老闆參選係因為精英藍/都會藍班blue blood想佢去撼Korean Fish，但係唔知點解阿主席吳敦義，點都唔肯改變初選嘅遊戲規則，堅持初選係要100%全民調來決定，咁對於中途先至參加初選嘅郭老闆，根本就係輸在起跑線。結果，郭老闆既然贏唔到初選，又無理由做Korean Fish副手，索性脫黨啦。但係，如果佢脫黨，獨立候選人去參加選戰呢，呢班精英藍/都會藍，礙於黨規，又未必敢公開支持郭老闆。郭老闆都係計數之人，條數計唔到，無謂硬去啦。
郭董唔選，即使綠營呂秀蓮去選，都唔會挖走English Choi好多票，如果就咁English Choi打Korean Fish，咁綠營就唔會太辛苦。因為依家Korean Fish之聲勢，真係拾級而下。問題係，藍營仲有一啲人，唔覺得應該搵Korean Fish去選總統。幾位藍營之大老，除了主席吳敦義落晒柯打一定要支持Korean Fish之外，其他就算係咁啦。上次Korean Fish嘅一次造勢活動，韓粉連英九哥都噓埋，仲要腰斬英九哥演說，真係激死班藍營大佬。唉！依家藍營上下唔係好齊心，仲咁內鬥落去，選情真係凍過水。