高雄市長韓國瑜
台灣Korean Fish真係頭痕，俾對家不停笑佢顧住打牌、飲酒同埋去搞總統選舉，荒廢高雄政事。咁最頂癮就係，Korean Fish拍咗條片，後面有一堆公文，話佢真係好忙，日日做市政工作云云。
以前返政府工，最佩服一位高人，佢係高官，出名高效率又準時走。問之，佢有一鋪今天的事今天搞掂的能耐，於是學之，結果都係做到晚晚九點鐘。稍長，望返轉頭，點解佢可以做到今天file昨天已批核之神速呢，其實一來，因為年事已高，成日唔記得嘢，如果今天的事唔係昨天做，乜嘢都唔記得晒。二來，經驗搭夠。我果陣後生，唔知邊啲要去，邊啲唔使去，邊啲hea做，邊啲認真做，結果就做死自己。但係，始終學習了一件事，就係唔好拖。所以見到Korean Fish將一堆公文去show off，證明佢係一個唔做實事嘅人囉。
咁點解Korean Fish要咁忙，平日做市政，周六周日跑選情？無法啦，冇人幫，冇副手，冇資源(唔夠啫)，樣樣自己去搵。早幾日佢埋班搞咗個國政顧問團，點知都係以前馬英九班底。馬班底，即係藍營核心之近衛軍囉。唉！無論你響地方選舉點威，最終都係要靠國王人馬先至可以組班，即係自己冇執政核心啦，呢樣真係有礙選情。難怪有傳佢可能好似四年前咁樣，中途可能畀人換走。呢個傳言，唔知真假，有可能係綠營人士放風打亂對手軍心之說。
Korean Fish早前po一張同美帝在台協會之相片，當然開心啦。因為美帝已不斷加強咗東亞部署，台灣政客唔去同美帝維持良好關係，好難參選。美帝策略係，既賣武器畀台灣掠一筆，另一方面就全面整合東亞各國地區之政治部署。咁對應香港，侵侵變臉之速度，真係好快也。
上次提過，侵侵由六月時，應該同北京傾好，唔干預香港事務。但係，美帝民主黨呢？佢地近期選情低迷，只好搵侵侵之施政失誤去狂鬧之。佢地搵到侵侵響貿易協議方面，懷疑對中國放軟手腳，一邊窮追猛打侵侵，另外就用香港去打侵侵，將香江嘅示威及侵侵之不作為，連埋一齊，形成咗侵侵為貿易協議犧牲香江。
侵侵回馬槍挺港反中之後，支持侵侵果啲名咀，個個都讚好啦。有啲支持者形容，香江事件，係一班激進民主黨人士，同埋一班美帝左膠之陰謀詭計，目的就係不斷咁樣打擊侵侵對中軟弱，以為呢啲係侵侵之弱點，點知侵侵即刻整個回馬槍，將香江問題同中美貿易談判掛鈎，破解咗激進民主黨及左膠的奸計云云。
睇完真係得啖笑。係人都知，侵侵唔鐘意搞外交，更唔鍾意理會人地家事，因為佢係傳統之孤立主義信徒，對於輸出人權民主自由冇興趣。但係，極右可以將侵侵對香江事之不作為，spin成侵侵打敗左膠陰謀之妙法。問你服未？