今日本欄響17年最後一炮，預祝大家來年事事順利。「一八實發」也。
放假就有時間思考。近日思考得最多嘅，都幾無聊，就係究竟溫和力量仲係唔係民主派內主流，就好似外國社會咁樣，激進只佔約15%，而佔大部分都係溫和，達40%云云。
計數我唔夠「假才子」叻。有人將外國的選民分析模型分析香港，然後得出香港溫和民主派佔全部泛民選民的40%云云。呢樣真係幾有趣。本報作者「假才子」已經在其網誌內提過，佢計晒上屆立法會議席的選民人數等，再用來分析民主派支持者的人口年齡分布及支持力度等情況。哦！原來，真係支持傳統泛民的，即是代表佢哋意見都溫和啦，大約只有26%，同埋所謂城市傳說中的40%，真係有一大錯誤，而且錯得過分。
既是如此，我哋可否調轉講，依家響立法會佔大部分議席的民主派議員，都係溫和派居多，咁其實佢哋都唔能夠代表民主派大部分選民。因此，如果響議會內的民主派組合，基本上唔能夠反映泛民的所有光譜，而佢哋又食住個議席，唔怪得民主派議員，更唔能夠代表26%以外的激進派選民，咁難怪民主派議員都受到網上批評啦！
但網上討論區都係敵唔過呢26%的選民。因為26%點都係泛民最溫和的支持者，年紀比較偏大，思想無可否認比較務實。而且更重要嘅係非常保守，唔想香港好「亂」，於是佢哋即使唔相信強國，但就認為，以依家香港民主派的實力，亦不可能與強國平起平坐了，更何況要同北方強國傾民主？唔好啦，基本上民主派都係螳臂當車，倒不如同北京據理力爭，爭取幾多都好，爭到些少食落肚就算。
呢個心理，好多人以為響八三一決定之後，已經有所轉變，特別係民主派前輩已經日益退潮之後，應該唔少溫和派醒了，唔會再因為北京的強硬操作而有過分解讀及幻想了吧！點知原來其實呢種「覺醒」論，都唔係真有其事，好多時係激進派朋友的一廂情願。說到底，年長嘅民主派支持者，點會無端白事走出嚟反北京呢？與其嘈佢哋點解唔覺醒，倒不如佢哋比好多人都清醒呢？佢哋可能會覺得，幾條友仔出來搞激進，咪係一樣所謂「無用」？難道北京會因為有幾條友掟嘢而又忽然覺醒放軟身段呢？
呢樣亦解釋咗，點解會冇人出來民主派議員的集會。年長的泛民選民，都係溫和立場居多，佢哋都唔會支持拉布，咁又點樣說服他們出來集會呢？至於激進嗰啲，部分又覺得，呢26%又唔可以代表我，又點解要出來呢？而且議會既然做唔到嘢，出嚟嘈又有乜用？依家民主派響議會之表現，溫和的覺得佢哋激進，激進又覺得佢哋溫和，大家感覺怪怪的，於是大家都冇出嚟了，唉！
