唔係人人都喜歡食辣，亦唔係人人食得辣，但每個地方都總有屬於佢自己嘅辣味，包括唔係以辣食聞名嘅地方，就好似瑞典咁。講起辣食，我先生話佢婆婆當年好怕食辣，就連蒜頭嘅辣都頂唔順，所以屋企煮親佢飯都從來唔可以加蒜。可見瑞典人，尤其上一代，對辣係幾咁敏感。時移勢易，瑞典人對辣嘅接受程度高咗好多。無辣不歡嘅我非正式地訪問咗身邊唔同年齡、性別嘅瑞典人，問佢哋覺得最能代表瑞典嘅辣味係咩，得出以下結論：
1. 辣根(典語：Pepparrot)— 辣根嘅味道同日本山葵Wasabi非常相似，根肉呈白色。辣根個名大家可能未必聽過，但必定食過，因為市面上大部分嘅即食Wasabi其實就係染咗色嘅辣根。有時屋企用晒Wasabi，我都會用辣根醬頂住檔先。真嘅Wasabi成本較高，相反辣根耐寒又粗生，喺瑞典更加幾乎隨處可見，有時經過高速公路旁都見到。煎鱈魚配牛油辣根係瑞典一道非常受歡迎嘅菜式，身邊唔少瑞典人都表示呢道係佢哋最鍾意嘅辣瑞典菜，各位嚟瑞典旅遊不妨試試。
2. 芥辣(瑞典語：Senap)——相比起我哋香港人食開、用嚟點燒肉嘅芥辣，瑞典芥辣味道比較甜同溫和，呈淡黃色且冇咁濃稠。出名嘅瑞典熱狗用嘅就係瑞典芥辣，另外瑞典著名嘅醃希靈魚，其中一個最家傳戶曉、必食嘅口味就係芥辣味。風味獨特，細細罐咁，用嚟做手信一流㗎。
我個人非常喜歡辣根同芥辣，但講到尾最回味嘅都係香港車仔麵嘅辣汁，嗰種味自己點整都整唔到，講起都流口水。唔知你最鍾意嘅辣又係邊種辣呢？
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
FB：為何斯德哥爾摩沒有譚仔三哥 by 三家姐
IG：sis3ter