我呢類學棍，不學無術，但都仲有些少研究能力。早幾日，肥平又響美帝上庭申請保釋被拒。美帝的法院有樣嘢好，就是高透明度。於是我就搵咗上庭前，控辯雙方的文件睇吓。
查實好多案件關鍵之事，已經響媒體講過，照理都冇乜新嘢。但係有一份控方佐證之文件，係肥平成本特區護照影印出來，交畀法院。我等研究人員，有機會睇埋，有啲驚訝。我估響美帝，因為法院重視資訊透明，照理就盡可能可公布的文件就公布出來。只不過，連人地護照全本影印擺上畀公眾查閱，唔怪得會有人認為，究竟控方係未「玩嘢」呢？
老友A一睇完呢啲影印本，打咗個突。佢話，呢本嘢反而令人覺得，究竟肥平，係未真係幫緊官方做民間外交，定係佢係一個空心老倌，無料扮四條呢？
因為老友A話，第一，佢去埋晒嗰啲相當敏感嘅地區，冇理由會用自己獨一無二嘅護照㗎？因為如果佢去了伊朗三次，又去阿曼，呢啲出入境嘅日期同時間，好多時就用完一本護照就掉走一本，唔可能話全部擺晒落一本護照度㗎？
第二，既然肥平係做緊一啲相當敏感的事務，有關人士，負責佢嗰條線之組頭，一定會好有經驗啦，唔可能求其到一個程度，任由佢揸住本民間私人護照四處飛，簽證簽埋一齊。咁係未呢堆有關人士之組頭失職呢？
老友A話，睇落如果佢嘅組頭係粗疏之人，咁就真係失職。因為美帝一收到佢本護照，一眼睇晒，知晒佢過往幾年之行蹤，咁就令人好懷疑，肥平背後之情報系統，真係唔合格。所以，老友A有一個大膽假設：what if 由頭到尾，肥平只係一個普通民間人士扮有官方身份及單位四圍搵食呢？
我就笑語，你的講法都冇乜可能啦，因為若果根據控罪書，美帝FBI一早就已經盯上了肥平，而且長期跟蹤肥平，連佢之起居生活出境入境資金流向，完全清楚。佢地搵夠資料之後先至拿出一啲證據去控告肥平。如果美帝覺得肥平係「無料扮四條」，一早就會知道啦，仲邊有可能花咁多力氣去跟進肥平案件呢？
講就咁講，現實係，肥平相信應該有一定的官方參與及幫手。但佢依家當務之急，相信係同另一個同案疑犯一樣，係早啲上庭拿到保釋。呢單案另一個奇怪之點，係同一件案負責安排收金之疑犯，卻好早就取得法庭保釋之許可，而且近期在家中自我軟禁期間，居然仲可離開屋企去律師樓嗰度開會，其保釋條件愈趨寬鬆，反而肥平就講到係世紀大案，保釋之後，馬上會走佬，仲會破壞美帝及其歐洲朋友關係，真係聽落不敢相信也。
老友A笑說，控方係未出緊絕招，迫緊肥平簽和解協議，迫肥平爆多啲料呢？真係好難講。