芭堤雅好多人都去過，但今次呢個18禁旅程就唔係人人試過，至少邦主身邊好多朋友都未玩過。點解18禁？因為真係唔多啱小朋友玩，一日嘅遊艇旅程去足3個島玩。
頭兩個島，都係玩浮潛、釣魚同跳海為主。釣魚的話，船費已經包咗漁竿等工具。如果玩浮潛就要交按金，船家會用快艇帶我哋去安全水域先落水，而喺Bamboo island，大家仲可以上海灘玩吓影吓相。至於跳海，當然係花式彈床跳水。
午開後，終於到達行程嘅亮點，馬騮島。未落駁艇已經見到岸上有成百隻馬騮列隊歡迎我哋。呢班熱情嘅泰國馬騮會非常主動咁跳上你身，你可以俾啲花生同水果佢哋食，上得呢個島就預咗俾佢當樹爬，如果驚就真係唔好去。大家千祈唔好主動接觸佢哋，以免發生危險。
回程原來仲有終極環節，全船人同對面船鬥舞！兩艘船同時響起強勁嘅音樂，大家盡情舞吧！如果去芭堤雅的話，真係要試吓呢個咁好玩嘅一日遊。