老友A係大學之流浪教師，依家除咗一邊響大學教書之外，已經要同院校各位大佬傾合約。其實外界未必會明白，下年九月的課程，呢個月已經開始要規劃，十二月左右就要確認。所以依家流浪老師想響下年有合約教書，已經舉晒手了。
不過，佢教嘅係社科，而且有教無類，咩嘢都肯教。但佢教開之學科，有兩件事發生。同一科目，兩年先至開一次。即係今個學年教完之後，下一個學年一係開新科，一係就等多一年。另外，今年佢地有機會停止招生一年，如果係咁，佢可能要去幾暑院校搵工。
我替大學流浪老師難過。剛剛有議員交咗一堆，從政府手上交出來之數據，睇起上來真係幾心驚。全職講師來講，薄扶林大學聘請之人數最多，而且係逐年增加，由2012至2013年之253個，爆升至2016至2017年之296個。五年之間增加咗43個。至於馬料水大學呢？由2012至2013年之264個，升至2016至2017年之284個。要注意，馬料水大學已經減少咗全職之講師，最高峰嘅時候，佢地講師數目係響2014至2015年學期嘅303個。當時，馬料水大學係全港聘請最多全職講師之院校。
不過，呢啲數字，就無辦法睇到，每個講師之合約年期。即係話，呢堆數字之中，有幾多個全職之講師，係一年、兩年抑或係三年呢？響無進一步數據之前，你就比較難取得一個比較有意義嘅分析結果。不過，以薄扶林大學為例，2016至17 年度，教學人員（連埋暫任嗰啲）有三千六百幾個，換言之，全職講師佔整體教師大約8% 。馬料水大學呢？2016至2017年度，教學人員，加埋晒啦，有三千三百幾個，全職講師佔約8.5%。不過，對比下西貢大學呢？西貢大學全職講師，由2012-13年嘅31個，增至2016至2017年嘅125個，而2016至2017年的全職老師有六百八十幾個，即係佢地之講師佔全體老師，高達18 %。
大概真係好難將橙同蘋果做比較。但數字睇到，如果有學校，有近五分一係全職講師的話，有理由相信，院校之研究真係好勁，好多人去衝論文，於是響教學需求大之下，就需要有多些講師去擔當院校基本教育，而且，大學聘請全職講師的人數不斷上升，顯示大學係有需要，靠呢啲老師去頂住教學的工作，問題係，我地仲未能夠掌握，佢地有幾多人係幾多年合約，如果知道埋呢啲比較詳細之數據，加埋邊啲學系聘請幾多位全職講師，就會知道大概之人力分布了。呢三間院校，加埋其他政府資助嘅大學，八大之全職講師，響2016至2017年就總共有1,061個。我地大膽假設，佢地都係有博士學位，即係呢班就係捱緊朝不保夕，唔上唔落嘅青年，就有千零個。我將呢堆數字講畀老友A聽，係希望佢明白，想由流浪轉全職，一啲都唔容易！