「九二共識」爭議不斷。
我鍾意睇波，不過對於戰術果啲真係乜都唔識。近年見利記好勁，於是就學人睇下佢地點解咁犀利。原來教練係一改咗利記的風格，依家轉成搶、搶、搶，響前場高壓，不斷迫到對方出錯。當然，要破解嘅就係守、守、守，守到你出錯就一嘢打贏你。
所以English Choi打咗咁耐守勢波，加埋島內九合一選舉唔得，內憂加外患，盟友準備散水，點知對岸一出手，講咗統一之新政策，話要用台灣式之「一國兩制」來統一，咁就即刻畀咗張牌English Choi ，將成件事扭成北大人要「統一」用「九二共識」，而「九二共識」就係「一國兩制」，「一國兩制」呢，台灣佬就一定say no。就係咁樣，English Choi一嘢反攻得手，民望大翻身。正所謂家國危難要強人， English Choi硬起來，民望自然來，咁佢地黨內唔同想逼宮之派系，個個暫時又收手矣。
焦點當然係獨派啦。其實同一日獨派四大長老已經發文逼宮，要English Choi做虛位之總統。咁如果唔係北大人之說話，English Choi一早就迫死咗。依家獨派逼宮，點知就畀人話，佢地響北大人之高壓底下，仲走去棒打自己人，結果畀綠營支持者鬧死。大家要記住，一個弱勢政權之下，往往內部就有最激進之聲音，就有一班人會講，如果把心一橫，走最激之路線，隨時連政權都不保。所以，依家仲係要睇獨派下一步點樣走。咁四大長老逼宮之事，真係撞正北大人出手而衰咗，獨派之大佬依家就話要出來選總統，睇下又點？
話分轉頭，English Choi一次反攻得手，暫且可以專注內部事務。美帝侵侵亦好頭痕。國會搞緊財政預算案，民主黨同侵侵大鬥法。咁侵侵點會咁易就範？膠著唔知要幾耐，人工都冇著落，咁侵侵希望民意會迫民主黨就範。似乎係，依家民情似乎又唔係一面倒去打民主黨，侵侵都幾頭痕。冇嘢嘅，美帝內部就係不斷地糾纏，而侵侵唔可能成日就咁針對民主黨，日日破壞無建設，依家民意唔係一面倒支持侵侵，咁就真係睇下邊個會先跪低。睇紐約時報仲以為侵侵一定會跪低，唔係嘛？
侵侵份人，無著數睬你都有味。美中談判，睇北大人報道，好易以為已經傾好。真係百思不得其解。如果咁易傾，侵侵晨早舊年就傾好單「刁」啦！談判時間越拖長，對侵侵越有利，侵侵幾大都拖到連任選戰之時都未傾好。而且，最好就係一波未平一波又起，今日傾好就聽日推翻，等北大人冇得翻身。去股市入貨，博美中有機會傾好單「刁」，小心呀！
臨尾老友A轉來，卜睿哲響布魯瓊斯學院寫咗兩篇文，講佢點樣睇北大人之告台灣同胞書四十周年講話，值得睇，總之連佢都叫美帝大力支援English Choi。佢都係睇淡，覺得北大人係玩硬攻唔係軟攻。睇路啦！