主要係貪平，儘管身邊朋友扯住我衫尾，扯到好似英超啲球隊後衛，扯住前鋒啲衫咁樣，我都決志去迪迪尼嗰度探索一下。
咁嘅價錢，其實都冇乜期待。點解呢？有數得計嘛。鄰近地區，一河之隔嘅長窿，價錢差唔多，不過又樣樣玩包晒。過咗一條河，就有動物表演載歌載舞雜技演出仲有纜車，但係響香港呢邊探索，真係乜都冇，除咗游水。我素來唔鍾意睇動物表演，所以游水就夠了。
大家唔知有冇見過，暑假時北方大小梅沙海灘之壯觀情景呢？有幾犀利？大家上網谷歌下就知道。呢啲咁壯觀之情況，原來響迪迪尼探索一下之泳池就一清二楚。記得後生嗰時，香港公共游泳池唔多，唯有成日去維園泳池，嗰陣維園泳池就真係連游蛙式都至少撞到八個人。
呢十年八載，香江富庶咗，好多屋苑會所都有泳池，依家香港公共泳池已經好少呢啲情況，估唔到今時今日，響香江迪迪尼都有大小梅沙及小時候維園之感覺，真係覺得，人老了，時光倒流真係好。
泳池嗰位哥哥見我又肥又轉唔到身，勸我不如去隔籬荷李活嗰邊之泳池，保證少人，不過最好都係行過去。撞正嗰日颱風之前三十六度日子，我就沿著海邊行十分鐘去搵泳池，身水身汗。到咗荷李活，就真係有荷李活之感覺，因為真係有巨星feel，少人到以為去咗泰國。真係唔明，點解嗰度越探索越似大小梅沙，呢邊就拍烏蠅呢？
食飯時嗰位服務員阿姐佢話，探索嗰邊做promo，於是入住率超過九成。呢邊就仲係正價，同平時咁上下。咁既然人少，係未真係有泰國feel呢？
依家明白，香江服務業輸響邊度。迪迪尼講到，適合一家大細玩，於是就泳池同兒童樂園一定要去啦。響泰國／印尼／日本，一入去泳池門口，就會有服務員笑笑口遞上毛巾，仲要整句問候語沙華D Cup。響迪迪尼，泳池阿姐，可能真係天口熱，笑容當然冇啦，又唔知佢心裡面有冇對我地啲住客整句問候語，總之就係香江典型的服務態度。
至於兒童樂園呢，兩位負責的小妹妹，可能真係天口熱，定係接待得太多人，總之畀我感覺，就係上次去老人展覽嗰啲機械人，仲比佢地熱情同投入。咁啦，一間咁細嘅兒童房，又免費玩，人多就肯定啦，係未？人多又嘈，最好就係做啲簡單嘢，玩一陣填色，五分鐘就填完叫細路出去睇電視，夠鐘就關門。
我都明白，東南亞酒店人工平，房租有競爭力，地方又大，搞嘅活動又自然多姿采一啲。至於日本呢家嘢，出晒名扮有禮貌，大家都明白嘅。不過，假如香江仲係收人咁嘅房租，服務仲係充滿強國三、四線城市水平，唔怪得人地長窿長搵長有啦。要東口東面之服務，去長窿啦，使鬼去迪迪尼。
