剛過去的周末在西九有一個《wow and flutter The Weekend 本地薑週末》以本地獨立音樂作主導，為期三天馬拉松式的本地大型音樂節，這三天裡合共超過七十隊本地樂隊演出。
如果平時只透過大眾媒體而留意本地音樂的話，應該只會覺得本地Band十隻手指都數得晒，而且未必知道每一隊Band的名稱及每一位樂隊成員的名字。而參加過《本地薑》才知道，香港閒閒地都可以有七十幾隊樂團，若然你有留意開本地獨立音樂的話，你就會知道原來香港大大話話都有幾百隊潛伏在各個社區。
早前，香港獨立表演場地Hidden Agenda (HA)因為牌照問題而被迫結業，政府一邊話推動本地創作事業發展，一邊又眼白白看著HA英年早逝。當然係人都知道，修例開放工廈係需要時間，分分鐘還要經過立法會審批等等，但可以多一點靈活性嗎？例如釋出一執閒置空地，讓樂團樂迷暫時有一個棲身之所？
當然談到空地用來發展音樂就必定會有人反駁：「而家連樓都冇得上呀，住都冇得住講乜嘢音樂發展呀？今次政府俾你哋喺西九搞音樂Show咪釋出最大的善意囉。」 如果你真係咁諗嘅，那我們係咪應該一視同仁將香港所有娛樂地方例如高爾夫球場、蘭桂坊、麻雀館、戲院、體育館、主題公園等等一併抽走及變為住宅用途呢？
香港人，真的只視衣食住行為生活必需品，而從來都不會視娛樂為基本生活需要？