EC職場周記—社交工程是甚麼？

【推銷達人竟然都被推銷】

趙總：「碧姐，我剛才出咗去上課，公司有冇咩特別？」

碧姐：「冇咩特別，都係啲常規嘢！我哋應付得嚟嗰啲！」

趙總：「有碧姐！簡直就喺我人生中最幸運嘅事件之一……」

碧姐：「趙總客氣啦！大家舊拍檔，跟住你搵食，你四處奔波，撐住成公司，呢啲都算係我人生中最幸運嘅事件……係呢，今日出去上堂，你咪講咗唔返嚟嘅！有急事要處理咩？」

趙總：「原本以為一般上吓年度性嘅CPD [1]堂，攞吓分，應付吓協會嘅要求……點知今日無心插柳，撞到新課程嘅首場，除咗題目新穎，嗰講者都ok，講解之餘，仲關心大家出席者攞到乜嘢？能否改善工作？仲有啲功課要做……咁啱我漏咗部電腦喺公司，所以咪返嚟，打算順便做埋先走囉！」

碧姐：「嘩！好特別喎趙總！根據我嘅記憶，你今次有兩種特別：首先，你好少讚導師！通常，你會搵出導師嘅漏洞，習慣多負面評價，正評喺少之又少……；第二，你好少咁緊張啲功課……加上，呢啲CPD課程，上完就算㗎啦！當時冇測驗、冇堂課……放咗學，攞埋証書，就關人……㗎啦！你未攞証書咩？」

趙總：「嗱！呢張咪証書囉！攞咗啦！講開又講，依家俾埋妳，勞煩妳幫我呈交完，順便入埋檔案吖；另外，關於功課，若果同妳上堂，功課就有妳頂住……但今次喺CPD，妳又唔洗上！冇咗妳，我梗係要靠自己啦！」

碧姐：「趙總過獎啦！你習慣食腦，我擅長落手，分工合作啫！」

【過去vs憧憬】

趙總：「今次的確喺有啲唔同！一開堂時，導師叫大家諗下平時銷售，會講乜嘢？有咩套路？有邊啲字必定會講？又有邊啲字，講咗會直接令到嗰次會成功埋到張單？……」

碧姐：「聽落，佢似向你請教，多過教緊你嘢咁喎？」

趙總：「呢嗰就喺比較特別嘅位！佢冇睇我哋寫咩，只喺想大家上堂前反思一下，然後佢就教書……最後，佢提醒大家比較一吓：喺腦海入面最新嘅做法，跟剛才寫低嘅舊做法，有咩分別？咁樣，唔經唔覺，即是幫每一位出席者做咗一次透徹嘅檢討……」

碧姐：「聽落有啲料到喎！起碼係我杯茶……我個人好理性，佢咁樣處理，換句話講即是將過去(was發生咗嘅)，同憧憬(will be未發生嘅)做比較……又好似人哋修身前跟修身後，映張相做比較咁上下！」

趙總：「高材生即是高材生！碧姐實至名歸！今日，由於眾人都各自做檢討，唔涉及分享；加上一眾出席者，大部份互不相識，咁大家就避開晒啲尷尬位！」

碧姐：「睇落，趙總真係好有得著咁！話時話，今日你係去上咩嘢堂？」

趙總：「社交工程 Social Engineering—4P營銷術……」

【社交工程喺乜傢伙？】

碧姐：「社交工程？未聽過喎！4P營銷術係唔係我哋讀工商管理嗰時，市場學嗰4個P [2] 呀？」

趙總：「4個P的而且確是以前讀過嗰啲，不過佢係借題發揮，依家興4個C [3]喎！至於社交工程就真係聽都未聽過，原來，社交工程一早經已出現咗喺大家旁邊！嗰啲電話騙案、推銷電話、客服中心對話……全部都屬於社交工程嘅範疇，而且，好有套路，同埋好有系統咁添呀！」

碧姐：「係啫！冇啦啦做乜要讀埋啲『電話騙案』同埋『推銷電話』嗰啲嘢嘅？」

趙總：「呢個範疇，係柔合咗：心理學、消費者行為、企業傳訊和人本服務……幾個學科而成嘅！我知道，好多我哋嘅客戶，包括：銀行、保險公司、連鎖品牌店……都從唔同嘅渠道，或是自己外國總公司、又或是聘請跨國嘅大顧問公司……開始進行相關培訓工作，也順道為日趨成熟嘅人工智能客服系統，準備為真人同科技融合世代，正在密鑼緊鼓…… 」