消費券點用？老闆跟下屬的妙問妙答
4月派發消費券，茶餘飯後，大家難免討論：「您打算點用？」若是同事，隨便無妨！若是老闆，小心當中玄機！
今期筆者刻意歸納了4種不同性格的老闆，除了預測他的動機外(妙問)，也替大家建議無縫吻合的應對(妙答) 。若老闆無機心，只是隨便關心，本文也無傷大雅。倘若老闆是有目的，棋差一著的他，還以為攻破了您的城府，讀心有術；其實，他經已被我和您的劇本接通了藍芽，被同步更新(轉化)了！
【好高騖遠】
老闆：「收到消費券，又睇啱咗咩嘢呀？」
當您把最新款手機、電器……如數家珍地點出，屬於這種性格的老闆，同時也會認為您好高務遠；手上的仍未掌握，但又不甘心腳踏實地。更甚者，他可以認為您不忠心，遇上好的機會便會「跳槽」。
筆者建議：
「最近發覺在家工作多咗，為了方便兼顧，打算買多部手提電腦，好讓提升工作效率……」
這樣，您就能由老闆心目中的「好高騖遠」轉化成：「工欲善其事，必先利其器」。為公司去到好盡，確實是一位不斤斤計較的好員工。
【華而不實】
老闆：「早半年前剛換咗新款，收到消費券，又諗住轉邊款手機呀？」
老闆可能一直都覺得您緊貼潮流，但另一方面，太注重表面的，往往在內涵方面都會疏忽。直接來說，老闆可能認為您「無料到」！
筆者建議：
「最近受疫情影響，搞到大家都唔開心！我打算趁這份政府的津貼，對自己好啲！氹吓自己……開開心心，做起工作都醒神啲！雖然手上嗰部仍然好新淨，我亦打算乘機送俾外甥，佢在家上網課，需要好啲嘅設備……」
這樣，您就能由老闆心目中的「華而不實」轉化成：「活在當下，對自己好啲」。筆者深信：每位老闆都欣賞公司當中，有一位懂得照顧自己及他人情緒的「開心果」。
【忍辱負重】
老闆：「您份人咁慳儉，收到消費券，又打算全數用嚟買家庭物資？」
老闆留意到您是節儉，關顧家庭的人；理應是一種美德，值得稱頌！只可惜，對於您的過份保守，甚至乎不太注重自己形象，從外觀至手機設備，都有點過時；這樣，部份老闆可能認為您有點「失禮」。
筆者建議：
「最近受疫情影響，家中老人家無論對前景、健康都過份擔憂……所以，我打算把消費券用喺購買家庭物資，讓家人多儲起一點現金，這樣，既無傷大雅，又令到佢哋安心、情緒得以舒緩。我一方面乘機多買一啲補品俾佢哋，另一方面鼓勵：待疫情過後，帶佢哋全家人去一次大旅行……氹到佢哋雙眼放晒光！」
這樣，您就能由老闆心目中的「忍辱負重」轉化成：「樹欲靜而風不止，子欲養而親不待」。當他更加體諒到您深思熟慮和關心家人的美德後，可能，下次加人工會特別厚待您哩！
【機關算盡】
老闆：「您咁精打細算，主修『格價』；今期收到消費券，又度到乜嘢無敵嘅消費攻略呀？」
老闆知您為人精明，處事細心。只擔心他也會認為您沿途都在「打算」著公司，處處計較，不願意多付出。
筆者建議：
「最近零售業受疫情沖擊，大部份都把握消費券呢塊『肥豬肉』，呢期嘅優惠的確史無前例。老闆你最明白我，我今次『在家』做資料搜集時，也順道為同事著想，歸納咗一份好啱我哋呢行嘅『攻略』，網上睇唔到㗎！老闆若果有興趣，我分享俾你，睇下幫唔幫到其他同事吖？」
這樣，您就能由老闆心目中的「機關算盡」轉化成：「大方有學識，發達靠分析」的印象。當中最關鍵的轉變，就是由「您算他」扭轉成為「我們一齊去算它」。從今開始，老闆可能會考慮把您納入他的「智囊團」。
【每人內心都有4位老闆】
每論您是老闆，或是員工；無論周朗今期口沒遮攔，有意無意間觸碰了您和老闆的感情；但我深信：在我們的心底 (inner me)，每人其實都存在著這四把聲音。倘若是真，我們應該順從哪位才是好呢？
答案好簡單，只要您能抽空，跟他們了解一次每人的需要，無論您最後的決定是怎樣，他們都會包容/體諒您的！在心理學，這個手法叫做「覺察」(awareness)。
筆者衷心祝願大家：好好善用消費券，在內心擦爆99倍積分(滿足感)。