市面上有很多自學教材引導年輕人自修。(資料圖片)
1.0 師教時代
2.0 自修時代
3.0 共學時代
上周與友人聊天，由於我們家中都有小孩，話題就扯到教育上。友人話他正在同一班志同道合者合辦共學團體，名為星睿華德福(前稱星星小窩)，由家長參與校政及共同承擔經費，我聽後覺得好有趣，先至醒悟原來教育不經不覺進入了新時代。
猶記得幾十年前，我們這代人讀小學時，社會正處於企管1.0時代——師教時代。當時嘅老師地位崇高，而我們亦懂得感謝老師傳授知識。直至出來社會工作後，當有需要學習時，就會走去遍尋名師教導所需嘅知識、技能和才幹。當年好少人無師自通，市面上亦少有提供自學教材。所以，在我們年輕時，想學嘢總會諗住搵老師指點迷津。
到咗八十年代之後，進入企管2.0時代——自修時代。由於社會急速發展，湧現出好多新知識，例如電腦、語言、藝術等。好多人就會利用公餘時間，不斷進修與工作有關的知識；亦有人發展個人興趣，走去學跳舞、繪畫、書法、烹飪等，不一而足。一時間老師供不應求，市面上便推出了很多自學教材，引導年輕人自修。再後來發展至網上學習，加速了自修風氣的成長，大家亦都不用拜訪名師指導，直接搵教材自學，形成一股清新潮流。
估唔到，到了近十年八載，又進入咗企管3.0時代——共學時代。自修當然方便啦，但係亦會產生問題。因為在自修過程中，如果遇到困難而又無人指點，就會令到學習中中斷斷，學習興趣就會漸漸降低，最終可能導致自修失敗。尤其在小學階段，有些家長發現學校未能提供他們想子女學習的知識及技能，唔符合家長嘅期望，所以他們聯同一班志同道合嘅家長，組成共學團體，一齊開辦學校，自行訂立辦學宗旨及設計課程內容。有些家長甚至提前退休，全身投入，主動分擔行政及教務工作。此外，他們亦都要自行籌募經費，以及共同承擔學校費用。有家長更加承諾，就算子女畢業後，仍然會繼續支持，令到學校可以長期運作。
他們認為新一代教育應該要讓家長參與多一些，令到學生學到的知識符合家長期望。家長還有一個任務，就是要令到學習融入日常生活當中，不要脫節。家長之間互相砥礪，將個人經驗及人生觀編入課程，令到教育進入新階段，做到名副其實學以致用。當然啦，要組成共學團體唔係話咁易，必須要有一群志同道合嘅人，並且願意承擔及分享先至可以成事。
我們見到這種嶄新嘅教育模式漸漸受到家長歡迎，而這些家長多數都是比較年輕，以及對未來教育抱有憧憬的一群。今時今日，百花齊放，教育亦似乎踏出了改變嘅一步，值得注意。
Paul sir話齋：老師教導學生照做，自修學習自控進度，家長共學承擔任務，學習模式多元進路。