車路士要求改期作賽被拒，最終又和狼隊，英超近4仗失7分。
據報歐洲4大聯賽球員接種疫苖嘅比例，除英超外，全部高達九成以上，意甲更高達98%，而英超最新公布預計大約升到75%。英超新一輪連環爆疫最先係熱刺，最快返出嚟都係呢支北倫敦軍，結果唔係三大箭頭哈利卡尼、孫興民同迪利阿里敗家，利物浦應該全失3分。
據報之前中招嘅老孫、尼當比利、盧卡斯莫拉同利古朗，鬥紅軍都有踢，唞返十日八日全部神奇變「陰性」，後生仔康復快多好；雖然表現有啲生疏，但勝在體力十足，呢段停賽期間打少紅軍3場，原來好著數。熱刺明天起英聯盃鬥韋斯咸，之後英超遇水晶宮、修咸頓同屈福特3支中下游隊，賽期唔改，隨時嚟個跨年4連勝；除咗「爆疫」期間最勇嘅曼城同阿仙奴，熱刺應該好想密密踢。
車仔隊內爆疫但唔俾「射波」、列斯聯成隊傷晒冇得走數，兩隊勁失分；曼聯、李城同阿士東維拉優質兵多，復出之時，估計一樣會好似熱刺咁生猛。做球迷嘅只想聖誕找點娛樂捧下愛隊，唔打針係個人嘅選擇，但搞到英超今日唔知聽日事，怪邊個？