一輪英超翻天覆地。曼城爭霸路上打殘車仔、爭前四嘅槌仔同紅魔失分，反而熱刺諗住天賜良機，一鋪打殘死敵阿仙奴，但賽會批准改期「放生」兵工廠。護級路上一樣咁激，愛華頓送3分俾諾域治，送埋自己領隊賓帥一程；眼見紐卡素買入「一前一後」年逾30嘅即食好手，主場都可以俾雜牌軍屈福特逼和。呢場波會觸動晒所有下游球隊嘅神經，列斯聯之後殘陣都照贏韋斯咸，暫救老帥比爾沙烏紗，有錢嘅紐記原來唔一定大晒。
護級成功唔一切要好有錢，但一定要有超強戰意，教打比郡嘅朗尼隊波又窮又殘，都可以守得穩攻得入；唔係扣咗21分，已經企穩英冠中游，剛擺脫包尾，係近年英國波嘅半季奇蹟。啱啱跌落英超包尾嘅般尼，俾紐記撬走首席射手攞返2,500萬鎊，但形勢唔會比英冠打比郡惡劣。只係要護到級一定要有好前鋒，既然有錢喺手，盡快喺英冠搵位射手返嚟頂檔，再等埋喺非國盃打拚緊嘅哥尼特歸隊；配合超強嘅「餓波」戰意，如果今晚殘陣都打得贏屈福特(19/01 03:30)，紐記真係震過貓王。