英超剛過去一周亂晒龍，前列分子多甩轆，得5隊波攞到3分，除咗無敵紅軍贏波無懸念之外，其餘4隊係半場落後兩球都贏嘅狼隊、絕殺車仔嘅紐卡素，原本好弱勢嘅般尼諾域治，亦都反底成功。英超亂成咁，可歸咎賽事太密，打體力、戰意多於技術，只見球星都踢到亂踢到殘，對成個聯賽生態唔係好事。亂局可從射手榜窺探，領先嘅占美華迪啱啱射12碼宴客，新一年未知係咪忙「湊仔」，跌晒watt；奧巴美揚動粗攞紅牌自動申請休息大半個月，哈利卡尼同拉舒福特場場要踢咁滯，終要入廠大修，4大射手缺席重擊列強，連成隊曼城最穩定嘅老將費蘭甸奴都擺烏龍，累球隊和波，可見大家踢到有啲不清醒狀態。
幸好打埋下月頭英超，英超玩小型歇冬，2月8至9日踢4場，14至17日踢埋其餘6場英超，全部10場波唔同時段進行，幾新穎。唞得最長嘅係曼聯同車仔，2月初起有超過兩個禮拜嘅休戰期，呢個新猷或者造就列強回氣後，喺下月中重開、速率同壓迫感一向唔夠高嘅歐洲賽，進一步壟斷。