踢波叻唔代表教波叻，隊波唔叻，但都可以出到一啲出色嘅管理班子。講緊係比賽戰情之激，長期要廠迷食「救心」先頂得順嘅阿仙奴，原來今季英超有唔少佢哋嘅名宿做緊影子主帥。屈指一數，阿仙奴今季就擢升昔日進攻猛將、前U23阿頭龍格保做一隊助理教練，愛華頓有另一前阿仙奴翼鋒般莫迪做一隊助理領隊，李斯特城今季就請咗當年兵工廠不敗神話嘅防守主將高路托尼做一隊教練。最猛嘅係前阿仙奴中場重心阿迪達，3年多前退役即做曼城助理教練，有朝一日代哥迪奧拿坐正都唔奇。
各隊副手們分工同銜頭唔同，但龍格保擺明係要谷關係密切嘅「小兵」上位，替波士艾馬利加快清走隊內好似奧斯爾呢類貴價兵。上周喺歐霸盃爆紅，之後聯賽又擔正嘅18歲翼鋒薩卡，大讚師傅龍格保呢幾年不斷傳授「武功」俾佢。阿仙奴今屆將傳奇中堅保特燉落去教U23，唯攻至上防守更嚇人，聯賽注定無望，唯有向盃仔埋手；今晚英聯盃鬥英冠森林，一眾「龍格保二世」又有上位良機。