2023-09-13 16:26:04

Ray Online｜房署署長羅淑佩到機場追星　張欣宇：不應指責公餘愛好

上星期暴雨襲港之後，房屋署署長羅淑佩被發現去機場追星，出席MIRROR成員陳卓賢Ian嘅錄影活動，引起社會熱議。新界北立法會議員張欣宇就喺社交網站發文力撐，提到無論係咩級別嘅公務員，有自己正常嘅愛好同埋興趣，並且喺公餘期間參加，平常不過，實在冇咩好指責。

張欣宇又詳述喺公職工作方面，過去1年幾喺交通運輸議題上同啱啱離開運輸署署長崗位嘅羅淑佩，有好緊密嘅交流合作。即使大家未必可以喺政策議題上取得一致，羅淑佩嘅能力、魄力以及敬業，贏得好多人嘅尊重。張欣宇又提到，由一啲中基層公務員口中了解到，黑雨期間，房署嘅抗災工作喺羅淑佩緊密督導下，處理得井井有條。根據地區所見嘅情況，公共屋邨除咗升降機故障較多之外，喺世紀水災期間基本冇發生大問題以及事故。張欣宇更加話咁樣嘅公務員，香港應該越多越好，希望大家有同理心、以人為本，令有心有力嘅人得到更多支持以及諒解，有更好嘅發揮空間。