![羅淑佩回應欣賞陳卓賢 訪問內大推Ian《地球上的最後一朵花》|Ray Online](https://cdn.am730.com.hk/s3fs-public/styles/article_image/public/2024-03/web-4-1024x683.jpg?itok=0A6JGYnb)
羅淑佩回應欣賞陳卓賢 訪問內大推Ian《地球上的最後一朵花》|Ray Online
現任房屋局常任秘書長羅淑佩,除咗喺打擊公屋濫用方面出名之外,佢廣為人知嘅「Hellosss」(男團MIRROR成員陳卓賢Ian粉絲)身份都一樣好出名,最近佢接受訪問時,就自爆後生時嘅偶像之餘,更親自開腔講點解特別欣賞Ian,仲大推Ian首《地球上的最後一朵花》,寄語時下年輕人要有信念。
羅淑佩接受香港恒生大學傳播學院《恒傳感言》訪問時話,自己平時做嘢好忙,所以一定有壓力,因此佢間唔時就會煮下飯,同埋睇演唱會減壓。
羅淑佩多次在公眾場合被發現追星:
羅淑佩自爆曾經鍾意「校長」譚詠麟
羅淑佩對於自己公餘時間追星成為網民熱話,佢就回應「好難理解」,「點解說出來好像發現新大陸咁,好像咁奇怪」。
佢又話,追星呢樣嘢成日都有種負面感覺,有人甚至唔敢同人講,不過佢自己就唔介意,「我媽咪嗰一輩鍾意陳寶珠、蕭芳芳、任劍輝、白雪仙,係人都知嗰喎」。佢又自爆,自己後生時鍾意殿堂級歌手譚詠麟,仲收藏「校長」所有唱片!
羅淑佩:鍾意Ian注重駕駛安全!
羅淑佩又形容,鍾意一個歌手自然係因為佢有獨特之處,就好似Ian注重駕駛安全,「年輕偶像或者年輕明星應該除咗歌唱得好,或者聲色藝之外,仲要將一啲正面訊息俾社會,作為一個榜樣。」
羅淑佩推介陳卓賢《地球上的最後一朵花》
她又推介陳卓賢首舊歌《地球上的最後一朵花》,「我明白有啲年輕朋友,有時覺得無咩人了解佢哋,好似喺一個虛擬孤獨地方;但唔緊要嘅,你有個信念一樣可以生根生長,一樣可以將花粉傳開去。」
羅淑佩寄語年輕人唔好「減薪躺平」
訪問就唔單止講追星,都有提到公屋政策,羅淑佩都強調,公屋旨在幫市民提供一個流轉及上游機會 ,鼓勵有能力嘅人置業,佢都寄語年輕人,千祈唔好為排公屋而選擇「減薪躺平」,「我哋都希望大家可以努力工作,賺多啲錢,可以爬上去,做業主都係人生一種成就!」