混血肥仔事件邊個最抵鬧？
上星期娛樂圈熱話莫過於混血肥仔嘅家事，雖然我唔明呢件私事有咩公共性，但3位主角嘅隔空公關戰，確為大家提供連日花生。
事件由一張男女食飯相引發，傳出已婚男方偷食旗下女藝人，男方老婆率先表態，以輕鬆中帶骨嘅文字暗示男方偷食；其後女藝人亦回應，話係男方同老婆分開後先互相了解，澄清自己並唔係第三者；男方最後表態，話同老婆經已簽紙分居，承諾會照顧仔女，又透露老婆想爭層樓。點知轉頭老婆又再發功，話從來冇收過分居文件。其實3位主角明顯一早知發生咩事，已跳過驚訝傷心嘅階段，直接去到公開隔空過招。咁，成件事邊個最抵鬧呢？
男人就肯定係問題關鍵，或者佢覺得兩公婆已經分開，即使有法律問題未處理好，追下女仔都冇乜問題，但感情從來就唔係講道理，加上老婆本身都有粉絲，觀感上，佢認為自己已回復單身可以追女仔，確係有啲一廂情願。但究竟應鬧佢出軌，定係等唔切搞清楚手續先搵第二個？
女藝人一心以為男方已離咗婚，如果要鬧佢，係話佢做小三？定佢錯在冇fact check？
至於老婆，喺呢啲事上總能站在道德高地，即使有人覺得兩公婆已經冇咗感情，所有文件都只係程序，唔係咁重要；亦有人質疑佢多次高調反駁，似乎係想打公關戰，唔襯受害人呢個角色。咁究竟應鬧佢太尊重程序公義，定為咗層樓而咁高調？
喺思考邊個最抵鬧嘅過程，即係比較緊成件事邊個係最大嘅加害者。但又有冇人關心過邊個係成件事必然嘅受害者？喺我哋不斷批評同指責認為最抵鬧嘅加害者，我哋嘅花生殼同時都會傷害到其他人。或者你認為有好多人係抵死，但其實大家嘅留言同指責，喺網上世界係永不磨滅，會傷害到無辜嘅小朋友？而成件事唯一肯定嘅受害者就係兩個女 。
公眾人物嘅家事，睇係可以，但大家最好都係講少句，否則都會成為加害者。