《影后》劇照。
台灣劇集《影后》係由一位前女演員演而優則導，成套劇真實地從明星視覺出發，但故事亦都經常描寫經理人，故仔其實仲有趣同真實(以下含少量劇透）：
一/ 明星未紅就靠你，紅咗就飛起你。
故事裡面嘅新人當初寂寂無名，有個好有心「胖姐」做經理人，基本嘢以外，佢唔怕樣衰幫女藝人爭取機會，被製作人蝦時又會幫佢出面，仲要教佢做藝人嘅基本態度：「等你是個咖(有戲份的角色)，才有資格掉眼淚」。但換來嘅係藝人一有機會就飛起呢個將自己由零變一嘅恩人，充分反映出經理人呢種毫無保障嘅投資。好似你買咗隻股票，佢跌嘅時候你要負責供股谷返上去，但一升返就立即同你講，唔好意思呢隻股票唔再屬於你。
二/ 廿四小時照顧明星生活，自己就冇晒生活。
劇中另外一位經理人，照顧兩個影后，一個年紀漸大成日病，經理人成日逼佢同帶佢睇醫生，三更半夜藝人撞車都要放棄約會衝去警局處理，經理人最後講咗句：「我連我媽媽入醫院都冇時間探。」經理人照顧藝人嘅唔單止係事業，仲有好多生活同心態嘅嘢，但正正係呢種全方位照顧，往往令到經理人本身亦全方位失去自己。
第三/ 身邊所有人都以為自己係藝術家。
另一位經理人，面對明星、攝影師同導演。明星自由自在勇於做自己，常常冇顧及其他人感受，成日要由經理人收拾爛攤子；攝影師「老油條」，喺拍攝現場玩嘢，又係經理人去𠱁掂佢；導演成日質疑自己嘅才華，又唔出聲扮高尚，甚至最後公私不分搭上女演員，又係經理人要面對同維持成個project繼續進行。好似呢個世界所有人都有權感性，經理人就冇權利有自己嘅情緒，只能處理所有人嘅情緒 。
睇完《影后》，我睇到嘅係經理人永遠嘅不利位置，但全世界觀眾只會俾掌聲演員，演員講乜，大家亦會覺得有說服力好多，所以連話語權呢一點，經理人以至所有幕後團隊都永遠處於不利：你睇吓套劇，都唔係叫《經理人們》，係叫《影后》。