MIRROR小組歌
MIRROR推小組歌，12人分三批、每月出歌。頭炮係姜濤、Anson Lo、Edan 同Jeremy嘅高甜情歌，仲去泰國拍浪漫靚靚MV。小組歌概念已講咗幾年，喺成軍6周年前夕實行，我覺得係反映MIRROR有長遠發展嘅決心。原因有三：
1)對每個鏡仔發展都有利：
做團同個人發展嘅最大差異，係同隊友之間嘅聯乘效應，你睇MIRROR做訪問時成班嬉鬧一番，歡樂度一定高過好多藝人訪問。不過下下要齊腳12個人做歌同出席活動，基本上係冇可能，小組形式係聰明嘅解決方法，仲令佢哋嘅作品元素多啲，俾大家見到每個鏡仔更多面向，對於每個鏡仔嚟講都肯定係好事，亦令到三個小組形成嘅MIRROR整體有長遠嘅持續力。
2)多元：
雖然係跳唱組合，但次次都推出超級跳唱韓式轟炸歌，始終有日都會悶，小組成員唔同風格技能，可以帶來新鮮感。有《Strawberry Love》呢啲輕快浪漫情歌，又會有Ian、Jer、Stanley同Tiger組成男人味濃嘅band sound，仲有跳舞擔當Lokman、AK、Alton同Frankie更多動感嘅舞風，以唔同組合同曲風展現新面向。
即係鍾意一個男人，想同佢燭光晚餐之餘，都會享受睇佢同朋友打波嗰種型，多元享受。
3)更多資源提升質素：
對粉絲嚟講，即使偶像擁有BLACKPINK嘅資源都會覺得未夠，但公司嘅資源畢竟唔係無限嘅，不同形式可以達到更好效果。好似《Strawberry Love》可以飛去泰國拍MV，art direction我覺得都比之前好多MIRROR嘅MV高質，關鍵就係齊腳12人要飛的話，成本已好高，美術同拍攝上嘅資源無可避免地唔係最多。所以小組安排係相對能夠達到「又要質素好又要多作品」呢個目標 。
小組名單引起唔少粉絲關注/批評，覺得邊個黐住邊個人氣。我聽講喺分組上公司俾咗唔少自由度班鏡仔，即係大家嘅偶像係有份決定嘅，不如感受下佢哋嘅心思。
MIRROR圈內外都面對好多攻擊，踏入第二個五年，點樣行得更遠係佢哋好大嘅課題，今次小組部署，我覺得係要話俾外界聽，佢哋有長遠發展嘅決心，而唔係只做solo搵最大嘅短期利潤。既然佢哋有決心，粉絲又係咪可以學習睇得長遠啲？