喺邦主心目中，上郵輪就一定要大吃大喝先至夠開心 。最好一日食足五餐，實行食咗先算！
簡單嚟講，船上有數之不盡咁多餐廳同食檔，基本分為免費同收費兩類。免費餐廳通常以主餐廳同自助餐為主，再加上數唔晒咁多小食、快餐等等。至於收費餐廳，不同船都有不同主打，一般都係高級扒房、意大利餐、日本餐、韓燒同亞洲餐之類，個別郵輪仲會有國際名廚主理或米芝蓮餐廳坐鎮。以食物質素同份量計算的話，價錢算係非常合理，CP值超高！邦主就試過食完個有阿拉斯加蟹腳嘅海鮮盤後，飽到食唔落甜品。
而免費主餐廳，基本上一日早午晚三餐都可以喺呢度搞掂晒，水準有保證。好多時，上船第一餐都會喺主餐廳食晚餐，點解？當大家下午上到船，洗過面、行個圈都夠鐘食晚飯啦！個人覺得大部分西餐都比較好食，但講緊成個行程咁長，食得多西菜，點都想食番啲中菜調劑吓！所以好多船都會加入中菜廳俾我哋揀。