經過近幾十年的建設，沙漠中不一樣的杜拜。
將石油變為現鈔，再將沙漠變為綠洲，炎熱風沙中都可以嘆冷氣飲可樂。呢度唔會有人破產，因為根本冇呢個制度，如果債務纏身而又無力償還，咁唯有永遠冇得出境而自我匿埋，這就是杜拜。
杜拜地標之一：Jumeirah Beach Hotel。
杜拜酋長穆罕默德．本．拉希德．阿勒馬克圖姆(阿拉伯語：محمد بن راشد آل مكتوم)曾經講過「世界冇人記住第二……杜拜只能做第一。」的確短短幾十年間，一個位於沙漠嘅小村落，變為現代化嘅壯觀奢華，不論建築以及人才都為全球之最、富豪天堂……好似係，但係唔包括原有的舊城區。
富貴勿懶，轉型要速
杜拜唔係國家，而係阿拉伯聯合酋長國中7個嘅其中之一，地方唔大，得三個多啲香港加埋。七世紀前依靠捕魚、造船同珍珠業務為主，到十六世紀被葡萄牙同歐洲嘅貿易商船帶動。再到1870年代成為海灣主要港口。而喺1966年發現石油之後，杜拜自此金碧輝煌。不過杜拜發跡並唔係單靠現時只佔國內生產總值大約6%嘅石油，而係酋長穆罕默德同前人嘅遠見眼光。
因為杜拜有兩個發現，一係地下石油，二係其實唔多。所以近20年房地產、旅遊、展覽、主題設施不斷落成，尤其極多嘅世界第一紀錄。唯一嘅七星級酒店Burj Al-Arab(帆船酒店)、最高嘅Burj Khalifa(哈里發塔)、Hotel Madinat Jumeirah(朱美拉古堡酒店)、最大的商場Dubai Mall連同全球最大嘅杜拜水族館、棕櫚群島、杜拜公園及度假村、海濱城等，再配合七十年代已建成嘅貿易中心、Shindagha隧道、Jebel Ali貨運港口、船塢等基礎建設，使到杜拜由昔日嘅飛機中途加油站，變為通商港口貿易同金融中心。
驟眼望以為中環至金鐘夏愨道一帶。
全球最高建築物：哈里法塔。
發展勿急，血汗勞工
反觀其他中東國家過於依賴石油，杜拜因有限而率先作為建設以另覓出路。不過又唔難發現其實現時好多公司，都由酋長穆罕默德持有。雖然2008年嘅金融海嘯曾經令到不少資不抵債又唔想坐監嘅人士逃離杜拜，剩下滿城遺棄汽車。不過有賴酋長的帶領而渡過難關，以至杜拜塔能改名為哈里發塔去繼續興建，甚至乎今年快將開幕嘅金色畫框杜拜門，不至於變為可能爛尾嘅世界島咁。不過呢啲著名建築亦主要由來自中國、印度、巴基斯坦、孟加拉、菲律賓等廉價勞工，在炎熱之下被迫開工，由背後不知幾多人嘅血汗及生命而建成，與同樣住喺舊城區嘅本地居民一樣，亦未必感受到地區繁榮嘅好處。
鱔稿勿信，旅程結終
近年有不少造勢文章講到杜拜有幾好發展，其實夏天嘅杜拜就好似喺太陽暴曬下的汽車車廂，加上全日從冷氣高樓所排放出嚟嘅熱風，仲未計沙塵暴已經頂唔順。高溫沙漠，唔怪得要著阿拉伯傳統男裝Kandura或女服Abaya，仲有當地穆斯林嘅信仰習慣，適應唔係咁簡單。
走過一年多共61期的「異地」，係時候隨著杜拜而拜拜。起步英國，經過歐洲各地、美國、太平洋島嶼，由生活圍繞到二戰歷史，滿是舊有情懷又或新鮮體驗，盡見前人建立的心思。在此有謝讀者的支持，相片文字伴作遊歷，專欄在此完結，願你喜歡「異地情尋」。
全球唯一七星級酒店：「帆船酒店」。
帆船酒店必須要事前預約，不設walk-in。