全球首部民用流動電話Motorola DynaTac 8000X，訂價4,000美元，「大哥大」叫1G時代開始。
天下武功，為快不破。意思即係速度就係取勝之道。究竟乜嘢叫做快如閃電，又有乜嘢真係可以比閃電更快？其實5G又點只係幾秒下載一部電影咁膚淺嘅理解……
Ericsson T68，全球首部彩色屏幕流動電話。
閃電嘅速度大概只有光速嘅一半，所以咪以為Lightning好快，咁嘅充電數據線真係貴得過態。講起充電線，由2G時代尾段先至加入傳遞數據功能；所謂乜G，G for Generation，代表行動通訊系統嘅發展。剛好到今年，正係5G服務商用推出嘅一年，香港就算唔係全球首個地點，亦肯定喺第一批先。
最強技術都會有最大競爭
二戰前嘅通訊就不在此詳談，由1983年全球首部民用流動電話Motorola DynaTac 8000X開始，正式於美國啟動1G時代，機價4,000美元。香港方面至到九十年代2G嘅Cordless Telephone 2nd Generation即和記天地線、其士步步通、訊聯經緯站才開始風行，當然配搭Call機係唔少得，仲要初期只可找出不能打入。再到歐洲制式數碼化GSM 900尤期GSM 1800即PCS嘅出現，正式將上述CT2甚至同期嘅美式包括韓式CDMA和記新幹線及TDMA訊聯電訊淘汰。亦正係GSM嘅出現，帶來語音以外嘅文字信息功能，而中文介面嘅流動電話亦係同時誕生，Motorola MicroTAC及StarTAC、Ericsson GH388同雙頻Nokia 6150，都係時代嘅代表。仲有全球第一部可以WAP上網嘅Nokia 7110同彩色屏幕電話Ericsson T68，及轉身版Sony Ericsson T68i亦大放異彩。
Ericsson GH398，G for GSM，為GH388之中文版本。歡迎使用，商務味濃。
最強武士都要有最強武器
雖然千禧年代嘅Palm及Windows CE連同變身電話嘅產品，加上Symbian都未能叫2004年在港推行嘅3G吸引，直至2007年iPhone嘅出現，終於數據可以得物所用，其智慧型Apps數據應用，發揮視像通話以外嘅連線互動功能，亦叫流動電話變為手機之多功能裝置，每年都要upgrade去「賣腎」。
2012年，香港正式推出4G服務，IP化功能叫數據使用率大幅提升，高質視訊及圖像加上速率已成為工作及生活不可少嘅配置。及至2018年中5G標準被制定，引入與4G Long Term Evolution完全不同之New Radio技術，理論上10Gbps傳送可快100Mbps之LTE之100倍，容量亦為1,000倍之多。不過5G最殺食嘅地方唔單只係速度，最重要係傳送速率之間超低時延，並且可以大規模聯網連接，將以往未能上網嘅裝置，通通於網絡世界互動，由速度所引伸嘅功能先至係改變生活嘅重點，其革命大大超越單單幾秒下載一套高清電影。
最強頻譜都遇有最大衝突
不過由於5G三個頻段中其中26GHz及28GHz所使用嘅頻譜係極高頻(EHF)，其訊號嘅繞射能力即轉彎有限，加上距離又短；又撞啱另一可入屋嘅3.5GHz頻譜與衛星接收發射相衝，所以亦將會設有限制區域。所以如果想室內都可以享用極速5G服務，大埔工業村及赤柱一帶公司及屋民可能需要搬遷了。
至於接近光速嘅5G技術可以點樣改變及「被改變」市民日常生活，下期再講。
Nokia 7110為首款支持WAP上網裝置。
StarTAC縮小至一手掌握，為流動電話之經典。