由八十年代手提電話民用開始，到今年即將迎臨5G年代，發展不足40年。技術大約每十年一代，中間仲有2.75G、3.5G、4.5G，每代相隔愈來愈短，依賴亦隨之而來。
上回講到香港5G有三個頻段，其中26GHz及28GHz之極高頻(EHF)頻譜射程短、穿透性低，範圍只有100米，所以需要大量發射站覆蓋作為配合。好在已經縮至鞋盒咁細嘅發射站，正好配合陸續更換嘅智能燈柱，將昔日「電燈柱掛老鼠箱」upgrade再現眼前。
萬物歸一 同一屋簷
至於剩下之3.5GHz頻譜，可做到現時4G(900/1800/2300/2600MHz)頻譜嘅覆蓋，作為主要5G頻帶入屋使用。雖然發展初期5G上網速度唔會快好多，不過其目標每秒可傳送高達10Gb嘅數據，更準確嘅定位，加上物聯網之(mMTC)技術可以將唔同器材收集嘅數據雲端化，另外只有千分之一秒(毫秒)近乎零遲延嘅通訊流，聯通人與人、人與物、物與物之間萬物互聯；結連大數據同人工智能，將智能家居、聲控家電、自動工業、遙距手術、無人駕駛(車聯網)、道路收費，甚至虛擬實境(VR)及擴增實境(AR)等等概念成功實行，超越最初1G簡單嘅人際通訊。
只要有電 齊齊在線
上述物聯網(IoT)技術可將配有電池及接電之實物作「無線射頻辨識」(RFID)即電子標籤化並聯結上網，以便透過雲端追蹤位置，作為遙遠控制及管理。而耗電量極低嘅射頻標籤，更可內置於衣服鞋襪、珠寶首飾、牲畜寵物，甚至植入人體之內；另一邊街頭動態鏡頭再配合人面辨識監控，實在喺「莫道你在管理物品，別人亦能管理著你」。當然好處係人流監察、交通管制、罪案防犯、疾病控制都能作即時動態更新。不過日後老公贈首飾，女朋友送衫，可能並非出於愛咁簡單。而某國家最近於小學推行智能校服，於校徽內裝置電子標籤，家長都樂意校方如此管理學生，監視目的為了保護；
今天學生，明天成年，將來就是大灣區人，可見23條立法正係保障香港市民。
一舉一動 盡在掌握
5G嘅革命並非一次系統升級，亦唔止4G智能手機嘅應用咁簡單。可見網絡營運商嘅收入渠道，亦隨著物聯網而多元化擴闊，並透過網絡切片(Networking Slicing)技術按客戶或行業度身訂造。科技唔止仲係一種個人生活模式，對於社會管理易產生作用，同時用甚麼國家的產品，亦將會成為愛國的指標。有如電影《Minority Report》(未來報告)情節一樣，5G正在監察人心。
聖經中啟示錄13:17記載「除了那受印記、有了獸名或有獸名數目的，都不得做買賣。」，唔知「獸」又係咪代表政權咁解呢？！順帶一提，大家記得更換智能身份證呀！
5G革命並非單純一次系統升級，亦不止4G智能手機之簡單應用，而是透過物聯網技術作「無線射頻辨識」，將人與物作動態管理。
從1G到4G之演進，正代表語音時代、文本時代、圖片時代、數據串流等多媒體時代之演變。