你要知道，今次施政報告，原本係要搞一件事，就係大唱力唱青年政策。以前施政報告，最後之兩頁，一定係政制或憲制政策。重要嘅嘢放最後。係呀，上一屆香江領袖，佢大鬧民族論，都係放響最後幾段。咁你就知，最後呢幾頁係重中之重。以前我睇施政報告，就真係先睇最後幾頁，然後至睇番轉頭。
早前有傳聞，舊年好打得上次面聖，有幾單嘢要加大力度處理。一樣嘢就係要做好房屋，咁大家都睇到，佢大搞土地房屋又人工島這樣那樣。不過，仲有一單嘢，就係青年事務。咁依家都好清楚，施政報告最後幾頁，就係講佢「三業三政」之進度。
進度好唔好呢？我就費時響呢度逐點講啦。但就係有樣嘢，係好好用嘅政治問題，一般響選舉時相當有用：你依家問下青年，一年過咗啦，你覺得生活好咗，定係生活差咗？又或者咁樣問，一年過了，少年，你覺得香江係有希望咗，定係冇呢？唔使問都知啦，即使你係老餅，你日日返屋企見到個仔女個個精神好咗，有朝氣咗，定係成個人都仲係冇乜希望，有神無氣呢？
民主派朋友就會話，梗係啦，政府唔畀民主自由，冇真正回應青年之自主、自由、民主等價值，梗係好火滾啦。老實，四年到依家，好多火都熄晒啦，大部分青年都只係返工放工交租打機，no hope，唔通日日上街爭民主咩！所以，呢啲民主自由等東西，依家一定唔係最essential之嘢。咁青年要乜呢？就係希望。
好打得之fans話，喂，依家大填海，有好多土地釋出，到時大家就對住呢個目的，咁仲唔係有hope咩？喂！依家又話青年唔生育，依家產假大手筆，14周，都係回應青年鼓勵生育啦！喂！依家又話青年冇屋住，好打得比你仲緊張，已經夾一啲臨時住房畀青年，仲有一些畀錢改善教育，兼且同商界議員劈到飛起都要搞嘅取消強積金對沖，仲已經係全方位幫手啦？
呢啲老老實實唔係hope囉。呢啲其實係一啲基本上已經病到入去ICU，早就應該處理嘅大病，唔改革就真係出事，而且早就應該響前兩屆已經處理，拖到依家就真係對唔住社會。但青年人需要之hope，唔係呢啲嘢。
經濟上之hope呢？除了炒炒炒，仲有乜嘢經濟動力呢？點解人工十幾年都變過呢？點解個社會好似好悶好窒息，想發洩一下發下聲都畀上幾輩人喝鬧呢？點解地產霸權仲係永續呢？點解自由越來越壓縮呢？即係話，呢個由老餅組成之政府，畀唔到一個好嘅願景，開心之環境，向上提升之動力呢？
青年覺得社會冇希望，又點會有向心力呢？講新想法樣樣都畀人ban，講永續價值又畀人鬧你冇發展觀剩係想小確幸，依家班權貴咁離地，施政報告係完美示範！