位於三藩市的漁人碼頭，是全球之首。
講到三藩市，呢個被當地人稱為Air-conditioning嘅City，有兩個世界地標：一個係跨海之Golden Gate Bridge(金門大橋），另一個係岸邊吸金嘅漁人碼頭……
呢個又叫「舊金山」嘅San Francisco，氣候變化溫差不大，四季陽光普照。舊金山從前的確係有金礦可淘，現在則變成透過旅遊業吸金嘅地方。其實Francisco係意大利名，為的紀念Ordine francescano(方濟各會)創始人Francesco di Assisi(方濟各)。1821年因為墨西哥獨立，將呢個本屬於西班牙嘅領土攞走，及後1846至48年美墨戰爭爆發，三藩市於首年便被美軍佔領，正係San Francisco點解唔係英文嘅原因。
全球第一漁人風貌
三藩市位於美國嘅西岸，California(加利福尼亞州)北部區域，鄰近太平洋，雖然係近海城市，但今時今日要去都唔會坐船，都係由香港直航或日本轉機。其中區內碼頭作用，已經不如從前客運和貨運之用，好在商業轉型亦令海邊重獲特色，將昔日只作短暫停留的地方變為消閑悠遊的集中地點，呢度就係Fisherman’s Wharf，中譯「漁人碼頭」。
叫得漁人碼頭就自然會諗到同海產有關，特色海鮮、佳餚美酒、唱歌跳舞，係暫時未有少林功夫加足球。有少少似長洲或者西貢嘅漁村風貌，當然會因應民族同文化習慣嘅唔同而有唔同嘅享受。而全世界第一個或者最具代表嘅地標，正係位於加州呢一個。
蟹中第一首長黃道
漁人碼頭範圍好大，由Ghirardelli Square直到35號碼頭，沿岸停泊咗唔少私人遊艇，而當中最出名就係已經改建為購物區嘅Pier 39。而Fisherman’s Wharf名稱嘅由來，相信係於十九世紀中葉嘅意大利漁民，適逢因為淘金潮移民湧入，由初時作為當地海產批發至今天最出名嘅Dungeness Crab，呢度依然係漁民及其船隊活躍的地方。
Dungeness Crab又叫Cancer magister，中文名為「首長黃道蟹」，微紅偏棕色嘅黃道蟹可以話係漁人碼頭嘅標誌。依家冬春正係盛產季節，而餐廳同攤檔小點就係周邊。而Pier 39內仲有過百年歷史嘅麵包店BOUDIN，配上酸麵包內嘅周打蜆湯，為當地微冷天氣下的一道暖流，冇嘢講啦！
和睦第一人人得利
而喺Pier 39以外，仲有停泊嘅船隻同遊艇，沿岸散步手執蝦條餵下海鷗，海獅亦喺度大曬太陽。互動味濃嘅街頭表演同紀念品店，呢份輕鬆自在嘅感覺，地方寛廣而毫不污糟。保持自然生態，適度規劃配合商業發展，鷸蚌不用彼此相爭，漁人碼頭並非只有漁人得利。
