早幾日老友傳來一份前澳洲總理陸克文(圖)的文章，大意係話，過去西方國家對強大的北方強國之時，有一種誤會，以為對強國相對溫和，有助強國走入國際世界秩序。佢話，呢個說法係有啲問題，因為今時今日強國並冇咁樣發展云云。
陸sir係澳洲方面一個有影響力之人士，年輕之時又從政又識中文，佢仲懂普通話傾偈，咁樣點都係知中派。佢老人家要響報紙上大鬧過往好多西方國家裡面之知中派，鬧到佢地累死西方國家云云，睇來相當奇怪。
大家都知啦，一個國家要處理對中政策，點會只有一個聲音，一個睇法至得㗎，一般呢，外國對中政策總係有鴿派同鷹派。點解有唔同聲音呢？原因好似好複雜。簡單啲講，尤其係過往十幾年，西方國家窮到死之時，佢地唔敢對中強硬。意思係，佢地冇能力硬碰強國，於是只能夠用軟功。用軟功處理對中政策，就要有一個說法去解釋點解佢地對強國咁軟弱。於是就用頭先嘅說法，即係同強國合作，可以將強國慢慢融入國際社會，走向民主自由云云。
鷹派之說法唔難理解：強國既然咁強，好自然會威脅西方國家，因為西方國家唔想強國去主宰世界。而且強國有時之國際行為，引起西方國家不滿。咁佢地覺得，咁樣忍讓落去唔係辦法。最好就係強硬啲，圍堵大力啲，壓抑強國嘅發展。 既然過去十幾年，鴿派之說法無法壓得住強國發展，依家不如就出手凶狠一啲，迫強國讓步云云。
正如頭先講過往十幾年，因為西方國家弱勢，人地強國領導趁此機會發展及擴張，都係正常嘅。而且，西方國家咁弱勢，又冇錢開飯，梗係想世界平和啲。好了，依家西方國家經濟好番，自然要處理外交問題。外交上，強國太強，會影響勢力平衡。佢地依家又點會相信鴿派之言呢？佢地一定要出硬招，力圖壓抑強國。
當然，依家西方國家咁惡，佢地又可以響接濟大門方面，大開銀彈，同強國鬥打「資源」戰，部分又響議會方面立法處處圍堵強國。老老實實，好多西方領袖，素來都唔信強國，心裡都不喜歡鴿派，人人心目中都想甩中抗中。所以，佢地自然會大大利用鷹派，處處針對強國啦！
好多人仲以為，依家西方國家對中政策之鷹派，只係掛羊頭賣狗肉，抗中只是扮嘢，向中國搵錢至真真云云。呢個說法都係得啖笑。因為依家之鴿派，真係因為過去十幾年睇錯強國發展，好多國家領袖都唔信鴿派。鷹派一直都想動真格，依家有機會發揮所長，點會唔去盡呢？如果你以為，強國畀多啲錢去各國辦貨買嘢，美帝就會收手云云，咁就真係誤判形勢矣，美帝係唔會收手，其他美帝盟友會對強國，更加唔會客氣！