英帝May姐搞脫歐，搞出禍。保守黨內有唔少爭議。強硬派話May姐咁脫法呢，真係同唔脫分別不大，否決之。黨內溫和派批評May姐，咁樣脫得不倫不類，不如唔好脫啦，仲可以支持第二次公投。成件事，輸在黨內。
脫歐大龍鳳去到上個月，已經唔係May姐的脫歐方案work 唔work，而係成班友盤算緊，點樣利用呢件事去「隊」May 姐，然後就等一個好時機去將May 姐趕下台。至於May姐幾時趕下台，就要計算啦。但就一定唔係前日，而且亦唔會響不信任投票下將May姐趕下台。因為如果保守黨有黨友支持工黨提出的不信任動議，咁工黨就必然會響之後的國會大選，贏到開巷。喂！保守黨幫工黨去贏選舉，唔係嘛？
如果聽日英帝國會大選，工黨有冇機會贏？未必。主要都係工黨內部仲有一班親歐派，即係貝理雅嘅一班人，覺得黨魁彬叔唔係好得。除了表面上，意識形態方面，唔接受到彬叔嗰啲極左意識形態之外，但更重要係，貝理雅背後的工商朋友或倫敦價值中產，唔鍾意彬叔。老實，彬叔代表嗰啲基層派及工會選民，響路線上同貝理雅嗰班人係有矛盾。依家貝理雅派系fade out咗，但仍然蠢蠢欲動也。
對工黨彬叔來講，最好都仲係等保守黨自我死亡，然後去執番個政權，好過依家全力迫走May 姐，一來自己未必贏硬大選坐正，二來貝理雅派系又可能迫宮趕彬叔下台。就係咁樣，保守黨同工黨，都有黨內矛盾，兩黨暫且有需要May姐響台上做多陣。就講到底，英帝之脫歐方案，其實就唔係傾緊脫歐，而係講緊幾時趕May姐落台。幾時？仲未係時機啦。
政治最緊要係奪權。權力最緊要到位，到咗位就係連任。English Choi將衝衝衝光頭昌做行政院長，加埋自己子弟兵，即係一個連任團隊已經形成。早輪仲傳出賴清德會唔會取代 English Choi出選，睇個勢已經傾好晒，綠營交畀 English Choi去拚連任已成定局。另一邊廂，由於English Choi去選連任，深綠，即係激獨分子，就會出自己人去選。依家反而係柯P會唔會去馬挑戰English Choi。台灣咁大，選舉唔能夠靠空氣，到底都係要靠地區組織及人脈。 問題係，柯P要半年內組織一堆大型團隊去選，得唔得呢？
去到最後，美帝之焦點，係政府要停運幾耐。但係侵侵都係心不在焉嘅，因為美中談判仲係講緊。上個星期仲有傳大家傾好，點知當美帝代表團返去華盛頓，美帝即刻變臉，早幾日副總統彭斯仲重拳鬧北方大國。睇美帝對中政策，今時唔同往日。依家美帝係相當敵視北方大國，就算有「刁」，美帝仲會響其他方方面面打北方大國。今日北方大國去買美貨，就算買一萬億美金，美帝一樣會加火加壓。侵侵會唔會暫停打壓北方大國？你話啦？
倫敦大學亞非研究學院法律系博士