無論喺香港定去旅行，邦主都非常鍾意逛街市。了解當地文化之餘，又可以食嘢同買嘢。
其實喺首爾、釜山同濟州，都有好多大型街市，比較多外國人去嘅就有廣藏市場、機張市場、札嘎其同東門在來市場等等。市場內，大家有機會食盡當地名物同小食，又平又夠地道。坐喺排檔食綠豆餅、血腸、豬肝同炒年糕，最後再叫多份紫菜包飯作結尾，真係聽落都充滿韓國風味。如果大家想食韓式拌生牛肉，廣藏市場內都有好幾間專門店提供拌生牛肉同牛肝，堂食同外買都得。仲有釜山嘅長腳蟹同濟州嘅魚生同鮑魚，統統都可喺當地市場食到，仲保證新鮮！
至於購物，都係以乾貨同調味品為主。唔講大家可能冇留意，其實韓國嘅調味醬料同乾海產都好得。當中最有特色會係韓式蝦醬，食落滿口蝦仔嘅鹹香。而海帶更加係聖物，當地其中一款家常湯水就係海帶牛肉湯，而佢哋生日就一定會飲呢個湯，希望可以健健康康！