近期香港吹起一陣班戟風，款式多多，由梳乎厘、流心到幾吋厚嘅hot cake等等，就算立食都話要等幾個鐘先有得食，足夠大家飛轉東京。
其實東京真係有好多咖啡店都有提供幾吋厚班戟，水準仲絕對有保證。邦主就試過誤打誤撞喺銀座食過神級班戟，呢間咖啡廳叫不二家，位於銀座Fujiya，所以好容易搵。原本邦主係想去樓上間超人氣星乃珈琲店，食三吋厚班戟同嘆咖啡，點知要大排長龍。正當邦主徬徨無助時，就發現咗呢間佈滿牛奶妹裝飾的不二家。不二家同樣主打班戟、西餅等甜食，但都有正餐選擇。厚班戟有多款口味，即叫即製，當新鮮鬆軟的班戟遇上雪糕同咖啡啫喱，真係冇得輸！除此以外，店內其他西餅蛋糕都好吸引，可惜邦主唔係一個甜品人，食完班戟已經捧住個肚，好滿足！