同樣位於通用汽車大廈的旅遊景點店舖。
要認識一個地方，與當地人住在一起最實際不過。尤其係經歷日常生活的出出入入，那種人來人往，撞口撞面咁肩摩轂擊。去街市買個餸，到快餐店食個飯，繁忙時間迫下巴士，先會知道呢個係點樣生活嘅地方。The next station：New York。
仍記得紐約朋友親口講過，紐約不代表美國。當然，透過美國電影和電視劇集，當中經過編寫而所展現的一面，絕非普遍美國人的生活寫照，亦正如中環的甲級寫字樓同蘭桂坊，也不等於香港的普遍市民生活風格。
穿越玻璃，發現顏色
講開美國的電影和電視劇集，或多或少都會喺紐約Central Park(中央公園)取景。公園長4公里濶800米，圍住公園四周跑一個圈，剛好接近10K馬拉松，可想而知有幾大。正正因為公園嘅風景一望無際，外圍附近嘅樓價亦係區內最貴。雖然公園裡面嘅設計確係吸引，尤其係取材自聖經嘅地標Bethesda Fountain(畢士大水池)，不過都唔及得兩個坐落於公園門口的傳奇商店：Apple Store同FAO Schwarz。
位於第五街(767 Fifth Avenue)嘅蘋果旗艦店，係全世界著名嘅景點。全店只有一個顧客使用之出入口，就係於General Motors Building(通用汽車大廈)前的一個長闊高分別30呎嘅玻璃立方體，而喺彌敦道嘅尖沙咀站入口，近年改建的設計亦有啲抄佢，不過原創當然係法國羅浮宮嘅貝聿銘設計喇。
穿越店舖，發現味道
原本一直使用率低嘅地下辦公室，搖身一變成為每日24小時、全年無休的零售店，全靠內裡玻璃的旋轉樓梯及透明客𨋢，當然仲有位於中間吊住嘅大大個白色Apple Logo。而係2011年裝修時，外圍更以15塊大玻璃，替代原本嘅90細小塊，效果出嚟更加簡約同埋大方得體。所以話蘋果產品，都係白色、銀色同埋玻璃組成，自成風格。
講完大人玩意，又轉個彎睇下小朋友玩具。同樣位於通用汽車大廈嘅FAO Schwarz玩具店，曾經都係小朋友同家長嘅樂園。玩具店能成為觀光景點，全靠店內殷切服務的店員。未入舖頭，喺門口親切嘅御林軍已經感到。由店外一同拍照，到店內的介紹及一同把玩，呢種大人陪同小孩的服務，這份尊重得呢度做到。
穿越世代，發現美國
FAO Schwarz係於1862年，由德國人Frederick August Otto Schwarz在美國創辦，而第五街舖就係於1986年遷入，三層佔地共6萬呎。唔單止可以打乒乓波、畫畫，仲可以大跳地板鋼琴，電影《Home Alone 2: Lost in New York》(寶貝智多星2)同《Mighty Aphrodite》(無敵愛美神)都有喺度取景。而2009年FAO Schwarz被對手Toys’R Us(玩具反斗城)收購，其亦於2015年開店30年後遷出第五街，新老闆亦係今年申請破產保護，奮力面對玩具業的寒冬。
時代變遷，行業交替，主力遊客亦由說歐洲語言變由普通話接力。有幸不變的是不論高端或是低價貨品，大人或是小朋友，紐約對現有還是潛在客戶的服務態度同樣重視，絕對優勝於香港……呢種優質服務其實都可以代表住美國啩！
