卡尼唔「射波」
太公波走到今年最後一個賽期，多數賽事無關痛癢，好似歐國聯A級聯賽4組，只有A3組荷蘭同匈牙利爭次名出線8強，其他首、次名大局幾定。B級聯賽嘅賣點係B2組嘅「獅落平陽」英格蘭，嚟緊作客鬥希臘，要贏波復仇搶返上榜首，下屆升返班，但對一眾大牌球員嚟講，實際意義又有幾大？
不過唔係好多球星好似麥巴比咁，同主帥迪甘斯傾掂數，冇傷冇病可以接連唔洗踢歐國聯。以英格蘭為例，31歲嘅哈利卡尼搵緊40萬英鎊周薪，喺年尾前球會連綿不絕嘅大戰快殺埋身；而佢幫緊嗰位暫代三獅主帥卡斯利，頂埋呢個月就走人，之後由杜曹接手，新人事新作風，劍指世盃。卡尼仍然肯為國家掛頭牌出戰歐國聯，心態正面長年大勇有因。三獅兵據報每場出場費只得2,000英鎊，全隊嘅車馬費近年都會捐去慈善機構，冒咁大受傷風險喺球會同大公波車輪戰中間游走，不收分毫；但又可以幫下隊內後起箭頭奧尼屈堅斯、蘇蘭基上位，呢種心態唔係搶咗個隊長臂章，又唔願踢嘅法國人麥巴比會明白。