天氣熱人易躁，一介書生look嘅車仔領隊杜曹，都被挑起怒火，睇得出佢開季壓力唔細。論教波成就，之前連續兩屆領軍打入歐聯決賽、仲係上任半季即領車仔封王嘅杜曹，唔會差得過淨係識帶隊攞聯賽冠軍嘅干地。干地技倆一向以自我激情鼓勵球員作戰，加埋今夏獲放水擴軍，季前被視為今屆倫敦「第一力量」。相反斯文慣嘅杜曹今年身邊嘅變動特多，場內老細換咗美國人、隊波已花咗暫時英超今夏最多嘅超過1.5億英鎊，換血未停，但整體實力弱咗；場外跟老婆離婚，近期被狗仔隊拍到跟巴西情人蜜運中，好好先生形象受損，忍咗成個夏季，上仗開咧小勝愛華頓已想發火。呢場車仔打得出奇嘅好，杜曹部署記首功，唔贏有啲唔抵；但前欠正箭頭後欠當打中堅，中場主力尼高路簡迪傷得多開始退步，杜曹短期可多用回收嘅中場新星干加歷查同箭頭布查，問題未必迅速浮現。只擔心今屆莫講要同擂台躉曼城爭霸，喺倫敦再遇狂人干地、青春風暴嘅阿仙奴已唔易食，美國班主狂揼水，耐性會有限。