賭波精阻唔到黑白兵
辛度東拿利賭波出事，係沙特人入主紐卡素後最失威之作；不過黑白兵強勢已成，少一個意大利新星防中，阻唔到佢哋爭上位挑戰藍月霸主地位。
當年曼城由卡塔爾人入主後，狂撬阿仙奴三線主力博上位，其中倒戈艾迪巴約入波後奔走大半場向阿迷示威，成英超叛逆經典一幕。如今紐卡素由沙特人控制，最難得油元掛帥，冇乜人討厭，絕少入錯貨；以為打返歐聯難兼顧，季初聯賽3連敗包括俾踢少個嘅紅軍絕殺，都打佢哋唔謝，近8戰6勝2和，啱啱大炒水晶宮，隊波正選用咗8個英格蘭人，包括唔係英格蘭主帥賀維買返嚟嘅中堅拿修斯、中場桑恩朗達夫同翼鋒積及梅菲，英人信英兵，老闆更安心。黑白兵如果明晚歐聯死亡C組主場贏埋多蒙特，氣勢會進一步加熱。
攞住連花紅成千萬英鎊長約、加盟紐卡素照黑面嘅東拿利，原來之前賭波成精，孭住罪疚離開祖家；睇怕呢鋪要放返一年半載無薪長假，季尾有機會喺屋企電視機旁，睇住越踢越順嘅新東家，終止長期冇盃荒。