陳卓賢以外的陳卓賢演唱會

巴黎奧運開幕禮咁大規模，即使越洋睇電視，都感覺到無數人背後嘅努力。不過對一個歌手嘅演唱會，現場觀眾好多時只聚焦歌手，即使次次都用唔少時間多謝一羣工作人員，觀眾雖然會俾面鼓下掌，但讚美時仍然會不合比例地忽略呢班人嘅貢獻。

陳卓賢(Ian)首次個人演唱會，有讚有彈，但有啲元素，大部分人反應都係正面嘅，亦都睇到背後好多人嘅努力。

第一：舞台。特闊嘅T字型舞台設計，壯觀之餘，亦令唔同座位嘅觀眾有機會近距離睇到歌手。偶像同fans當然開心，不過據我了解，咁嘅設計就擺少咗千幾個位，即係每晚少約二百萬元門票收入，肯為咗歌手同fans開心而賺少啲，相信唔係個個主辦者都咁易話為。

第二︰手燈。Ian唱《鯨落》時，場內手燈嘅效果，係好似有條鯨魚圍著Ian暢泳。自從MIRROR出咗官方手燈之後，我覺得團隊就有個目標，就係透過手燈做到專屬而理想嘅效果。當中唔只要擺好多心機，仲要夠勇敢，因為你永遠唔知現場有幾多人會拎住官方手燈配合個效果。官方手燈初初出嘅時候，一如以往被人話貴，但其實用足咁多個演唱會，大家亦會感受到一齊拎住同一款嘅手燈，感受專屬嘅效果，歌手同觀眾嘅感動，同大家各自拎唔同嘅應援係有所不同。

第三︰細節嘅設計。除咗有熒幕嘅圖案，台上仲有實體黃金色稻草，視覺效果多元化；全場都有特選香薰，做到4D享受。就連飄落嚟嘅紙碎都晚晚唔同，有樹熊形狀，仲有樹幹可以完美砌得埋。而放出來嘅泡泡一掂到地下，會好似仙境咁嘅效果，非常之浪漫。咁多細節，你想唔想像到背後有幾多人造就。

Ian演唱會其中一個賣點就係佢自己做埋音樂總監，以上元素佢當然有份諗，但係大家都明白，諗係容易做先難，以上各部分嘅執行，涉及嘅工作人員唔會少，但有幾多人會欣賞？觀眾嘅讚美往往只係俾晒歌手，唔係唔啱，但我覺得世上其實係冇真正嘅「個人」演唱會，大家唔吝嗇地讚背後嘅工作人員，先可以繼續吸引到有心人去做演唱會，做出更有溫度嘅表演。