在一個陰晴不定的下午，兩爺孫坐在公園內對弈。「阿爺，好耐都無同你捉象棋喇！」「孫仔，阿爺呢幾年鍾意玩手遊，成日出動去捉精靈，點知最近撳到手指都出毛病。」「吓，呢隻Game我無玩好耐喇！」言談間，阿爺握起拳頭後，張開手指給孫仔看，只見中指維持著屈曲的狀態。
「阿爺，你呢種情況係彈弓指，常見喺拇指、中指同無名指度。彈弓指嘅成因，其實同手指重複屈伸，或者用力握拳嘅動作有好大關係。負責將手指屈曲嘅肌腱，俾一條類似管道嘅腱鞘包圍住。正常情況下，肌腱同腱鞘之間有活動空間，但當雙方不斷互相摩擦，例如手指重複用力去打機、打字或者做家務，就會引起腱鞘發炎同增生，令管道逐漸收窄，尤其喺手指底部、近掌心位置產生痛，同埋卡住嘅症狀。」
「等等，附近又有隻精靈出現，等我將佢收服咗先！」說罷，阿爺便拿起手機，起勁地按屏幕，一邊玩一邊續道，「孫仔，阿爺諗住搜勻全港，將所有精靈一網成擒，困佢哋喺精靈球裡面，再訓練到完全馴服先放返出嚟。」「但我擔心你未捉晒所有精靈，條屈指肌腱就已經被困住喺腱鞘裡面啦！」
「其實阿爺對呢啲卡住嘅困局，都到咗忍無可忍嘅極限，有冇辦法從根本解決問題？」「聽醫生講，彈弓指分四期，第一期只有痛、無卡住；到第二期就有卡住，但手指仲可以完全伸直。早啲發現，只要食消炎藥同做物理治療，都可以紓緩情況。有時醫生會注射類固醇喺腱鞘附近，促進腱鞘炎康復。但如果唔理佢，就有可能變成第三期，卡住嘅手指要靠另一隻手先可以伸返直；甚至去到第四期，手指鎖住喺屈曲嘅狀態。到時就惟有開刀做微創手術，切開腱鞘膜嚟鬆解肌腱。」
「將軍！」「阿爺你一心二用，都可以捉贏我嘅？」「你幾時見過阿爺出手會輸㗎？孫仔，you are too simple, sometimes naive！」「咁不如我哋打機對戰精靈，等我贏返鋪？」「好！我派比卡超嚟招呼你。」「比卡超CP值咁低，你都揀？」「阿爺揀佢係因為佢夠忠誠，明未？」
作者為骨科專科醫生