MIRROR今年真係唔應該去叱咤
唔好以為我收到咩風先咁寫，有文為證，我一早講過，組合大獎呢，為咗平衡利益同增加未來一年籌碼，就肯定俾Lolly Talk嘅。男歌手方面呢，都講過尹光贏先對鏡仔係最好嘅結果。
咁點解我話MIRROR今年唔應該去叱咤呢？因為上個禮拜發生一件事，我覺得大家未睇到真正嘅意義。最強公關軒公落區拉票，我推測呢步棋係咁玩嘅：
1）張敬軒先生其實2014年後都冇拎過叱咤嘅我最喜愛男歌手，即使係香港被形容為冇乜歌手嗰幾年，都唔係佢拎。今年係好好嘅時機，對手打緊逆境波，連尹光都入局，幾個fans都唔少嘅男歌手一早被out，仲唔擸埋佢哋啲票？落區拉票真係跑出就最好，但只係次要，最重要係呢一個幽默嘅做法，可以用笑立於不敗之地，MIRROR三子任何一個贏佢，軒公都已站於高地，點回應都盡收公關效果，對手仲分分鐘被人鬧得更加甘。
2）軒公fans多又識玩社交媒體係人都知，佢亦都真係一個對音樂有認識同貢獻嘅人，入圍我最喜愛的男歌手一啲都唔出奇，但為咗要有話題而令尹光入圍、Apple Music全年第一播放率嘅MC張天賦出局，我就真係對呢個頒獎禮嘅心地有所動搖。加上年近80嘅尹光突然對社交媒體得心應手，如有神助，識公開響IG讚軒公落區，又話投咗票俾佢，一唱一和，樂壇大團結。你諗下，軒公一直係公關達人，尹光就神奇地突飛猛進，連涉嫌摸林明禎都有辦法喺網上討論帶走風向。強強聯手，咁邊(幾)個會成為孤島，被啲haters借題發揮？
MIRROR一月中開演唱會，聽講佢哋公司緊張程度高到一個點，比充足更充足嘅排練同預備就緊嘅，唔去一月一日叱咤頒獎禮，大條道理，最多俾人話小器。但去呢？贏又冇人恭喜你，輸又被人踩多兩腳，集中精神彩排，做好個演唱會回饋觀眾，唔係更加啱數咩？