濕滯音樂節
政府最近非常積極發展盛事經濟，致力重塑「亞洲盛事之都」形象，雖然活動一浪接一浪，但並非次次都辦得好好睇睇。年初就有搞到滿城風雨的「美斯之亂」，不但令入場觀眾乘興而來敗興而歸，仲引來國際媒體廣泛報道是次災難，主辦Tatler Asia更由賺變蝕嘔凸4,300萬港元，造成世間罕有三輸局面；而最近就輪到首次來港舉辦韓國濕身音樂節《WATERBOMB》出事。
《WATERBOMB》音樂節在韓國當地差不多有十年歷史，台上歌手和台下觀眾可以拎起水槍互射「打水仗」，上年開始衝出韓國殺入世界各地。根據官方網站顯示，今年除了香港外，音樂節會在日本、新加坡、廈門、杜拜、胡志明市、洛杉磯、曼谷、台北、峇里島等地方舉行。
揀得香港，證明有市場兼香港亦做得掂件事，可是活動首日的安排卻是十分甩轆，完騷後大批觀眾冒住風雨苦等數小時，仍然未能取回寄存行李(主因是綁在行李上的標籤不防水)，好多人冧雨數小時，凍到面青口唇白，仲驚動到警察到場了解。
煲出一鑊粥是誰之過？《WATERBOMB》雖然有旅發局協助宣傳，亦獲得「政府文體旅計劃」支持，但它實際上沒有申領任何政府資助，所以幾乎100％都是主辦方責任，政府不用孭飛，你最多只能夠話楊潤雄腳頭認真麻麻。楊局長應該都知道事件或多或少影響到「香港品牌」，所以都有講兩句撇清關係：「不想因為一件事令香港予人錯誤感覺，以為香港發生的盛事都做得不好。」可是，呢頭講完，嗰頭又出事，被譽為亞洲最大型音樂盛事的《One Love Asia Festival》，最近突然宣布改日期改地點，搞到原定出席的孫燕姿、徐佳瑩及動力火車未能參與，要容祖兒、湯令山、理想混蛋臨時頂上，其餘嘉賓演出場次都大洗牌，焫㷫大班要改飛、退票的歌迷，濕滯程度不下於《WATERBOMB》。
正如古天樂在最新的旅發局廣告話齋：「做多啲啲，今時今日，就係要呢啲！」好多事做多少少結果已經不一樣，但偏偏香港搞的「盛事」，永遠就是爭少少，好像《WATERBOMB》音樂節，明明開騷前幾日已經知道打風落雨，為何不行多一步，將標籤換上防水物料以防萬一？因為好多時香港人只是一心想搵錢，而不是做好件事，就算有人提議做定預防措施，話事的一定是諗臨時臨急換標籤，牽涉幾多人力物力呀，當然博一切大步檻過，有事再算！結果就是偷雞唔到蝕渣米，賠了夫人又折兵，下次《WATERBOMB》重臨香江，實搵第二個單位搞手承辦，見過鬼都怕黑嘛！